Қазақстанның Конституциялық соты шетелге тұрақты тұруға кеткен азаматтардың зейнетақы төлемдеріне қатысты Әлеуметтік кодекс нормаларын қарады., деп хабарлайды dalanews.kz.
Іске азаматтардың зейнетақы алу құқығын Қазақстан аумағында тұрақты тұрумен байланыстыратын нормалардың заңдылығына күмән келтірген соттың өтініші себеп болған.
Шетелге көшу зейнетақыдан айыра ма?
Конституциялық соттың мәліметінше, азаматтың елден тыс жерге тұрақты тұруға көшуі оның зейнетақы алу құқығынан автоматты түрде айырылатынын білдірмейді.
Сот Қазақстан азаматтары шетелге кеткеннен кейін де өздерінің конституциялық құқықтары мен кепілдіктерін сақтайтынын атап өтті.
Төлемді тоқтатуға тек заң аясында жол беріледі
Сонымен қатар Конституциялық сот зейнетақы төлемдерін тоқтату тек заңда нақты көрсетілген жекелеген санаттарға қатысты ғана қолданылуы мүмкін екенін түсіндірді.
Яғни мемлекет барлық жағдайда бірдей төлемді тоқтата алмайды.
Үкіметке бір жыл ішінде өзгеріс енгізу ұсынылды
Осыған байланысты Конституциялық сот үкіметке бір жыл ішінде Әлеуметтік кодекске түзетулер әзірлеуді ұсынды.
Түзетулер соттың берген түсіндірмелері мен құқықтық ұстанымдарын ескере отырып дайындалуы тиіс.
