Қазақстандық қоғам белсендісі Шерзод Пулатов қоғамдағы әдеп, жастар тәрбиесі, үлкенге құрмет және қоғамдық орындардағы мінез-құлық мәдениеті туралы пікір білдірді, деп хабарлайды dalanews.kz.
Ол Facebook парақшасында Жанарбек Әшімжанның осы тақырыптағы ойымен келісетінін айтып, соңғы уақытта жастар тәрбиесі, мәдениет және ұлттық дәстүрлерді сақтау мәселелеріне қоғамдық сұраныс артқанын жазды.
«Адамның мәдениеті үлкен сөздерден емес, қарапайым дүниелерден көрінеді: қалай сөйлесеміз, қалай амандасамыз және өзімізді басқа адамдардың арасында қалай ұстаймыз», - деп жазды Шерзод Пулатов.
Оның айтуынша, қоғамдағы мәдениет мәселесіне Президент Қасым Жомарт Тоқаев та назар аударған. Мемлекет басшысы халықтың жоғары мәдениеті өркениетті мемлекет құрудың маңызды негіздерінің бірі екенін атап өткен.
Шерзод Пулатов қоғамдық көлікте, саябақта және сауда орталықтарының маңында жұртшылыққа ашық түрде интимдік жақындық танытуды орынсыз деп санайды.
Ол мұны адамдардың жеке өміріне араласу емес, қоғамдық кеңістіктегі әдеп мәселесі ретінде қарау керектігін атап өтті.
«Қоғамдық кеңістік дегеніміз балалар, аға буын, түрлі көзқарас пен дәстүр өкілдері қатар жүретін орта. Мұнда жеке еркіндік айналадағы адамдарға деген құрметпен және өзін ұстай білу мәдениетімен үйлесуі керек», - деп жазды ол.
Пулатов сондай-ақ Абайдың ұят туралы ойларын еске алып, шынайы ұят адамның айналасындағылардың пікірінен қорқуы емес, өзінің іс әрекетін ішкі ар өлшемімен бағалай білуі екенін атап өтті.
«Нағыз мәдениет өз еркіндігіңді сақтай отырып, жаныңдағы адамға деген құрметті ұмытпау қабілетінен көрінеді», - деді ол.
