Qazaqstandyq qoǵam belsendisi Sherzod Pýlatov qoǵamdaǵy ádep, jastar tárbiesi, úlkenge qurmet jáne qoǵamdyq oryndardaǵy minez-qulyq mádenieti týraly pikir bildirdi, dep habarlaidy dalanews.kz.
Ol Facebook paraqshasynda Janarbek Áshimjannyń osy taqyryptaǵy oiymen kelisetinin aityp, sońǵy ýaqytta jastar tárbiesi, mádeniet jáne ulttyq dástúrlerdi saqtaý máselelerine qoǵamdyq suranys artqanyn jazdy.
«Adamnyń mádenieti úlken sózderden emes, qarapaiym dúnielerden kórinedi: qalai sóilesemiz, qalai amandasamyz jáne ózimizdi basqa adamdardyń arasynda qalai ustaimyz», - dep jazdy Sherzod Pýlatov.
Onyń aitýynsha, qoǵamdaǵy mádeniet máselesine Prezident Qasym Jomart Toqaev ta nazar aýdarǵan. Memleket basshysy halyqtyń joǵary mádenieti órkenietti memleket qurýdyń mańyzdy negizderiniń biri ekenin atap ótken.
Sherzod Pýlatov qoǵamdyq kólikte, saiabaqta jáne saýda ortalyqtarynyń mańynda jurtshylyqqa ashyq túrde intimdik jaqyndyq tanytýdy orynsyz dep sanaidy.
Ol muny adamdardyń jeke ómirine aralasý emes, qoǵamdyq keńistiktegi ádep máselesi retinde qaraý kerektigin atap ótti.
«Qoǵamdyq keńistik degenimiz balalar, aǵa býyn, túrli kózqaras pen dástúr ókilderi qatar júretin orta. Munda jeke erkindik ainaladaǵy adamdarǵa degen qurmetpen jáne ózin ustai bilý mádenietimen úilesýi kerek», - dep jazdy ol.
Pýlatov sondai-aq Abaidyń uiat týraly oilaryn eske alyp, shynaiy uiat adamnyń ainalasyndaǵylardyń pikirinen qorqýy emes, óziniń is áreketin ishki ar ólshemimen baǵalai bilýi ekenin atap ótti.
«Naǵyz mádeniet óz erkindigińdi saqtai otyryp, janyńdaǵy adamǵa degen qurmetti umytpaý qabiletinen kórinedi», - dedi ol.
