Ресейде 9 мамырға арналған әскери парад қарсаңында мобильді интернетке шектеулер енгізілді, деп хабарлайды dalanews.kz.
Reuters мәліметінше, Мәскеудің бірқатар ауданында пайдаланушылар сейсенбі күні мобильді интернеттің істемей қалғанын байқаған. Алайда дауыс арқылы қоңырау шалу қызметі қалыпты режимде жұмыс істеген.
Ресей билігі бұл шараларды қауіпсіздікпен байланыстырды.
«Бұл шешімдер қауіпсіздік мәселелеріне, соның ішінде дрон шабуылдары қаупіне байланысты қабылданды», – деп түсіндірді ресми өкілдер.
Сонымен қатар елде интернетке бақылау күшейіп келе жатқаны атап өтілуде. Соңғы уақытта түрлі сервистердің бұғатталуы жиілеп, пайдаланушылар VPN қызметтерін көбірек қолдана бастаған.
Ұялы байланыс операторлары мен ірі компаниялар да ықтимал іркілістер туралы ескерткен.
«Мобильді интернетте, мессенджерлерде және онлайн сервистерде уақытша ақаулар болуы мүмкін», – делінген хабарламаларда.
Сарапшылардың пікірінше, мұндай шектеулер ірі мемлекеттік іс-шаралар алдында қауіпсіздік шараларын күшейту тәжірибесінің бір бөлігіне айналып отыр.
