Ресей мен Қазақстан Жайық өзенінің экожүйесін қалпына келтіруге бағытталған 2027–2032 жылдарға арналған бес жылдық бірлескен бағдарламаны әзірлеуді жоспарлап отыр, деп хабарлайды dalanews.kz.
Бұл бастама Ресей табиғи ресурстар және экология министрінің орынбасары Дмитрий Тетенькин мен Қазақстан Экология және табиғи ресурстар вице-министрі Мансұр Ошырбаевтың кездесуінде талқыланды.
Тараптар жаңа бағдарлама аясында Жайық өзенінің су сапасына қатысты мәліметтермен тұрақты түрде алмасуды, су тазарту нысандарын салу және қолданыстағыларын жаңғыртуды, сондай-ақ өзеннің экожүйесін сақтау бағытындағы ынтымақтастықты күшейтуді көздеп отыр.
Кездесу қорытындысында екі ел өкілдері осы бағыттағы жұмысты жалғастырып, алдағы уақытта да тұрақты консультациялар өткізетінін жеткізді.
Айта кетейік, соңғы жылдары Жайық өзенінде су деңгейінің төмендеуі, судың ластануы және балық қорының азаюы Қазақстан мен Ресей үшін өзекті экологиялық мәселеге айналды. Осыған байланысты өзеннің табиғи тепе-теңдігін қалпына келтіру екі мемлекеттің бірлескен іс-қимылын қажет етеді.
