Ресей Қазақстанның мұнай экспортын Балтық теңізіндегі Усть-Луга портынан Қара теңіздегі Новороссийск портына бағыттап жатыр, деп хабарлайды dalanews.kz Reuters-ке сілтеп.
Төрт дереккөздің мәліметінше, Қазақстан мұнайын Новороссийск пен Усть-Луга арқылы экспорттайды. Алайда Мәскеу тамыздың соңынан қыркүйектің соңына дейін Қазақстанның барлық транзиттік мұнайын Қара теңіз арқылы жөнелтуді көздеп отыр.
Бұл өзгеріс Ресейге Усть-Луга портындағы Қазақстан мұнайының орнын өз шикізатымен толтыруға мүмкіндік береді. Бұған Қара теңіздегі жағдай күрделенуі себеп болып отыр. Украина дрондарының шабуылдары Ресей мұнайын тасымалдайтын кемелерді жалдауды қиындатып, Қара теңіздегі мұнай тиеу жұмыстарын баяулатқан.
Дереккөздердің үшеуі тамыздың соңында Усть-Луга портынан жөнелтілуге тиіс болған KEBCO маркалы Қазақстан мұнайының кемінде екі партиясы Новороссийскіге бағытталғанын айтты. Қыркүйекте Усть-Луга портынан KEBCO мұнайын тиеу әзірге жоспарланбаған.
Осылайша, Усть-Луга портында тәулігіне шамамен 100 мың баррель мұнай экспорттауға мүмкіндік туады. Бұл қуатты Ресей өз мұнайын экспорттау үшін пайдалана алады.
Қара теңіздегі мұнай тасымалы үшін ресейлік экспорттаушыларға танкер табу қиын болып отыр. Дереккөздердің мәліметінше, қауіпсіздікке байланысты кеме иелері бұл аймақта Ресей мұнайын тасымалдаудан бас тартып жатыр. Соның салдарынан мұнай тиеу мерзімі де кешігіп келеді.
Қазақстан мұнайы қаупі төмен жүк ретінде бағаланады. Сондықтан оны тасымалдауға танкер жалдау жеңілірек. Financial Times басылымының хабарлауынша, Украина Қара теңіз порттарынан Ресейге тиесілі емес мұнай тасымалдайтын танкерлерге жасалған шабуылдарды тоқтатуға уәде еткен.
Дереккөздердің айтуынша, қазақстандық мұнай өндірушілер бұл шешімді қолдайды. Себебі қазір мұнайды Қара теңіз арқылы экспорттау Балтық теңізі бағытына қарағанда тиімдірек.
Қазақстанның KEBCO мұнайының басым бөлігі Жерорта теңізіндегі мұнай өңдеу зауыттарына сатылады немесе "ҚазМұнайГаз" ұлттық компаниясына тиесілі Еуропадағы мұнай өңдеу кәсіпорындарына жеткізіледі.
Әзірге Ресейдің де, Қазақстанның да Энергетика министрліктері бұл ақпаратқа қатысты пікір білдірмеген.
