2027-2028 оқу жылынан бастап Қазақ ұлттық қыздар педагогикалық университетіне жаңадан түсетін студенттерге тамақтану шығыны өтелмеуі мүмкін. Ғылым және жоғары білім министрлігі осындай ұсыныс әзірледі, деп хабарлайды dalanews.kz.
Қазір мемлекеттік білім беру грантымен оқитын университет студенттерінің ыстық тамаққа жұмсаған шығыны толық өтеледі. Қаражат студенттердің банк шоттарына тікелей аударылуы мүмкін.
Алайда министрлік 2027-2028 оқу жылынан бастап бұл жеңілдікті бірінші курсқа жаңадан қабылданатын студенттер үшін алып тастауды ұсынып отыр. Ал грантпен оқып жүрген және 2027-2028 оқу жылына дейін оқуға түскен студенттер тамақтану шығынының өтемақысын алу құқығын сақтайды.
Министрлік бұл бастаманы бюджет шығындарын қысқарту қажеттілігімен түсіндірді. Дегенмен қанша қаражат үнемдеу жоспарланып отырғаны әзірге нақтыланбаған.
Сонымен қатар білім беру гранттары мен стипендияларды жою көзделмеген. Ұсынылып отырған өзгеріс тек тамақтану шығынын өтеуге қатысты.
Құжат «Ашық нормативтік құқықтық актілер» порталында жарияланды. Қоғамдық талқылау 3 қарашаға дейін жалғасады.
