Қытай билігі елдің салық резиденттерінен шетелдік трасттардан түсетін табысқа 20% салық ала бастайды. Bloomberg агенттігінің хабарлауынша, жаңа талап әлемдегі ең бай адамдардың бірқатарына және олардың мұрагерлеріне әсер етуі мүмкін, деп хабарлайды dalanews.kz.
Агенттік бағалауынша, өзгеріс әлемдегі ең бай 500 адамның сегізіне және олардың мұрагерлеріне қатысты болуы ықтимал. Олардың шетелдегі активтерінің жалпы құны 140,2 млрд долларға бағаланады.
Олардың қатарында NetEase компаниясының негізін қалаушы Уильям Дин мен PDD Holdings компаниясын құрған Колин Хуан бар. Bloomberg мәліметінше, Диннің байлығы 37 млрд долларға, ал Хуанның шетелдегі активтері 29 млрд долларға бағаланады.
Бұл кәсіпкерлердің байлығы АҚШ пен Гонконг қор биржаларында саудаланатын компаниялардың акцияларымен байланысты. Ал олардың активтерін басқаратын трасттар офшорлық юрисдикцияларда тіркелген. Bloomberg дерегіне сәйкес, Қытай билігі салық төлеушілерге айыппұлсыз есеп айырысу үшін 22 қазанға дейін уақыт берген.
Жаңа салық тәртібі шетелде активтері бар Қытай резиденттерінің кірістеріне қатысты салықтық бақылауды кеңейтуді көздейді.
