Қостанай облысы Полиция департаментінің бастығы, полиция генерал-майоры Ерлан Файзуллиннің туған бауыры Нариман Файзуллин ұсталып, уақытша ұстау изоляторына қамалды, деп хабарлайды dalanews.kz.
Halyqstan мәліметінше, кәсіпкер Нариман Файзуллинді Астана қаласындағы Ұлттық қауіпсіздік комитеті департаментінің қызметкерлері 26 тамыз күні арнайы операция барысында ұстаған. Ол Қостанай облысы Полиция департаментінің басшысы Ерлан Файзуллиннің туған бауыры болып табылады.
Алдын ала ақпарат бойынша, Нариман Файзуллин пара беруге итермелеу фактісі бойынша күдікке ілінген. Алайда бұл ақпарат әзірге ресми түрде расталған жоқ. Ресми мәлімет ертең жариялануы мүмкін. Құқық қорғау органдарындағы дереккөздердің хабарлауынша, тергеу барысын Бас прокуратура бақылауда ұстап отыр.
Анонимді дереккөздердің мәліметінше, күдікті қылмыстық істердің бірі бойынша делдал ретінде әрекет етіп, амнистия қолдану мәселесін шешіп беруге уәде еткен. Болжам бойынша, мұндай «қызметтің» құны 15 миллион теңге болған.
Қазіргі уақытта Нариман Файзуллин уақытша ұстау изоляторында отыр. Оған қатысты қамауға алу түріндегі бұлтартпау шарасын санкциялау мәселесі қаралып жатыр.
Ашық мемлекеттік тізілімдердегі мәліметтерге сәйкес, Нариман Файзуллин Қостанай облысында тіркелген «Степняк 2015» жауапкершілігі шектеулі серіктестігінің басшысы ретінде көрсетілген.
Айта кетейік, Ерлан Файзуллин Қостанай облысы Полиция департаментін 2023 жылдың мамыр айынан бері басқарып келеді. Ол полиция генерал-майоры атағына ие.
