ҚТЖ компаниясы Қожамжаровтың туған інісінің фирмасын сотта жеңді, деп хабарлайды Dalanews.kz.
Өткен жылдың соңында “ҚТЖ-жолаушылар локомотивтер” компаниясы Дулат Қожамжаровқа тиесілі “High Industrial Lubricants & Liquids Corporation” (HILL) ЖШС-мен дизель майын жеткізу туралы келісімшарт жасаған. Шарттың жалпы құны – 504 млн теңге, ал жеткізу мерзімі 2025 жылдың 31 желтоқсанына дейін деп белгіленген.
Алайда жеткізуші өз міндеттемелерін толық орындамаған. 2025 жылдың 1 тамызында компания мемлекеттік тексерулер мен сот істерінің қызметке кедергі келтіріп жатқанын айтып, келісімшартты бұзуды сұраған.
“ҚТЖ-жолаушылар локомотивтер” басшылығы келісімшарт бұзылғаннан кейін 46 млн теңге көлеміндегі авансты қайтаруды және шарттың 10%-ына тең айыппұл (50,4 млн теңге) төлеуді талап етті.
HILL компаниясы айыппұл төлемеуді сұрап, жеткізудің 40%-ын орындағандарын алға тартқан. Дегенмен, сот КТЖ талаптарын толық қанағаттандырып, төмендегідей шешім шығарды:
• аванс ретінде төленген 45 769 957 теңге,
• айыппұл сомасы 50 401 768 теңге,
• мемлекеттік баж ретінде 2 885 152 теңге өндірілсін.
Компания иесі кім?
Дулат Қожамжаров - Қазақстанның бұрынғы бас прокуроры Қайрат Қожамжаровтың туған інісі. Ол “Hill Corporation” компаниясының жалғыз құрылтайшысы, кәсіпорын майлау материалдарын өндірумен айналысады.
