Қырғызстан парламенті Мемлекеттік ұлттық қауіпсіздік комитеті төрағасы қызметіне Жұмғалбек Шабданбековтің кандидатурасын мақұлдады. Ол бұл лауазымға Қамшыбек Тәшиевтің орнына ұсынылды.
Кандидатураны парламентте президенттің өкілетті өкілі Бектур Зулпиев таныстырды. Депутаттар тағайындауды бірауыздан қолдады.
Жұмғалбек Шабданбеков еңбек жолын салық қызметінде бастаған, ал 1994 жылдан бері ұлттық қауіпсіздік органдарында жұмыс істейді. Әр жылдары басшылық қызметтер атқарып, МҰҚК төрағасының орынбасары болған.
10 ақпаннан бастап ол ведомство басшысының міндетін уақытша атқарып келген.
Айта кетейік, 10 ақпанда Қырғызстанның Министрлер кабинеті төрағасының орынбасары – Мемлекеттік ұлттық қауіпсіздік комитетінің төрағасы Қамшыбек Тәшиев қызметінен босатылды.
