Қазақтар мен мұсылмандарды қорлаған Алика Мұхамадиеваға үкім шықты, деп хабарлайды Dalanews.kz.
Бүгін Қарағанды қаласының Қазыбек би атындағы ауданының соты Алика Мұхамадиеваға қатысты Қылмыстық кодекстің 174-бабының 1-бөлігі бойынша бас бостандығынан айыру жазасын тағайындаған айыптау үкімін шығарды.
Осы үкіммен оған Қылмыстық кодекстің 74-бабының тәртібінде жазаны орындауды кейінге қалдыру шарасы тағайындалды.
Сот үкімімен Мұхамадиева ҚР ҚК-нің 174-б. 1-б. бойынша кінәлі деп танылып, оған 3 жыл 6 ай мерзімге бас бостандығынан айыру жазасы тағайындалды, жазаны өтеу екі жылға кейінге қалдырылды.
Кейінге қалдыруды қолдануға оның 2 жасар баласының болуы негіз болды.
Бас прокуратура 2025 жылғы 16 қыркүйектен бастап Қылмыстық заңға 5 жылдан астам бас бостандығынан айыру жазасы тағайындалатын жекелеген қылмыстарды қоспағанда, жас балалары бар әйелдер үшін жазаны өтеуді кейінге қалдыруды міндетті түрде қолдануды көздейтін өзгерістер енгізілгендіктен, бүгінгі күні жазаны кейінге қалдыру міндетті норма екенін еске салды.
Еске салсақ, 2025 жылдың жазында Threads әлеуметтік желісінде Алика Мухамадиева салған постардың қазақстандықтарға қатысты қорлайтын сөздер бар деген шағымдардан кейін тергеу нысанына айналды. Шілде айында ол қамауға алынып, іс материалдары тергеу органдарына жолданған болатын.
Кәсіпкер бұған дейін кінәсін ішінара мойындап, айтқан сөздері контекстен үзіп алынғанын мәлімдеген еді. Ол көпшіліктен кешірім сұрап, ешкімнің намысына тиюді мақсат етпегенін атап өткен.
Прокурор Мұхамадиеваны 4,5 жылға соттауды сұраған.
