2026 жылдың екінші тоқсанында қазақстандықтардың ипотека мен автонесиеге сұранысы айтарлықтай артты. Бұл туралы Ұлттық банктің банктер арасында жүргізген тоқсан сайынғы сауалнамасында айтылды, деп хабарлайды dalanews.kz.
The tenge жүргізген зерттеу нәтижесіне сәйкес, ипотекалық несиелерге өтінім саны өткен тоқсанмен салыстырғанда 19%-ға өсіп, 228 мыңға жеткен. Сонымен қатар ипотекалық қарыздың орташа көлемі 5%-ға артып, 21,5 млн теңгені құрады.
Банктер сұраныстың өсуін мемлекеттік тұрғын үй бағдарламаларының жалғасуымен, ипотекалық өнімдердің қайта іске қосылуымен және жылжымайтын мүлік нарығындағы белсенділіктің артуымен байланыстырады. Сондай-ақ 2026 жылдың соңына дейін ипотека бойынша жылдық тиімді сыйақы мөлшерлемесінің шекті деңгейінің сақталуы да нарыққа оң әсер еткен.
Автонесие нарығында да өсім байқалды. Екінші тоқсанда автонесиеге берілген өтінімдер саны 20%-ға көбейіп, 1,5 миллионға жетті. Сарапшылар мұны автосалондардағы жеңілдіктермен және банктердің субсидияланған мөлшерлеме бағдарламаларымен түсіндіреді.
Сонымен қатар ипотекалық несиелер бойынша мақұлдау деңгейі 33%-ға дейін өссе, автонесиелер бойынша бұл көрсеткіш 18%-ға жеткен.
Ұлттық банк дерегінше, үшінші тоқсанда да ипотека мен автонесиеге сұраныс жоғары деңгейде сақталады деп күтілуде. Банктер бұл үрдісті мемлекеттік бағдарламалардың жалғасуы, қайта қаржыландыру мүмкіндіктерінің кеңеюі және автодилерлермен әріптестіктің күшеюімен байланыстырып отыр.
