Әуе билеттерін сату сайты арқылы қазақстандықтардың жеке деректерінің таралуына кінәлі ресейлік Sirena Travel компаниясы жауапкершілікке тартылды, деп хабарлайды Dalanews.kz.

Informburo.kz мәліметінше, бұл туралы Қазақстанның Цифрлық даму, инновациялар және аэроғарыш өнеркәсібі министрлігінің Ақпараттық қауіпсіздік комитетінің төрағасы Руслан Абдикаликов хабарлады.

“Біз өткен аптада ғана Ресейдің «Роскомнадзор» мекемесінен жауап алдық. Олар компанияның ресейлік заңнамаға сәйкес жазаланғанын хабарлады,” – деді Абдикаликов Орталық коммуникациялар қызметіндегі брифингте.

Алайда Sirena Travel қандай жазаға тартылғаны әзірге белгісіз. Шенеунік жеке деректері ашық қолжетімді болған қазақстандықтар өтемақыны тек сот арқылы талап ете алатынын атап өтті.

“Өкінішке қарай, қазіргі уақытта бұл мәселе бойынша не ресейлік, не қазақстандық заңнамада нақты процедура жоқ. Біз бұл жүйені енгізуді жоспарлап отырмыз. Киберсақтандыру іске қосылған кезде азаматтар өтемақы ала алады. Ал әзірге жалғыз жол – Ресейде сотқа жүгініп, шығын келгенін дәлелдеу,” – деп түсіндірді ол.

Еске салайық, өткен жылдың желтоқсанында Sirena Travel компаниясы таратылғаннан кейін қазақстандықтардың жеке деректері ашық қолжетімді болып, тарап кеткен еді.

Желіге 2007–2023 жылдар аралығындағы 700 мыңға жуық ішкі рейс туралы мәліметтер тарады. Онда Air Astana, Scat, Qazaq Air және Bek Air әуе компанияларының жолаушыларына қатысты ақпарат болған.

Мәліметтер базасында сондай-ақ қазақстандықтардың ресейлік әуе компанияларындағы халықаралық рейстері туралы ақпарат бар. Жарияланған файлдарда жолаушылардың жеке деректері, құжат нөмірлері, телефон нөмірлері мен электрондық пошта мекенжайлары көрсетілген.