Áýe biletterin satý saity arqyly qazaqstandyqtardyń jeke derekteriniń taralýyna kináli reseilik Sirena Travel kompaniiasy jaýapkershilikke tartyldy, dep habarlaidy Dalanews.kz.
Informburo.kz málimetinshe, bul týraly Qazaqstannyń Tsifrlyq damý, innovatsiialar jáne aeroǵarysh ónerkásibi ministrliginiń Aqparattyq qaýipsizdik komitetiniń tóraǵasy Rýslan Abdikalikov habarlady.
“Biz ótken aptada ǵana Reseidiń «Roskomnadzor» mekemesinen jaýap aldyq. Olar kompaniianyń reseilik zańnamaǵa sáikes jazalanǵanyn habarlady,” – dedi Abdikalikov Ortalyq kommýnikatsiialar qyzmetindegi brifingte.
Alaida Sirena Travel qandai jazaǵa tartylǵany ázirge belgisiz. Sheneýnik jeke derekteri ashyq qoljetimdi bolǵan qazaqstandyqtar ótemaqyny tek sot arqyly talap ete alatynyn atap ótti.
“Ókinishke qarai, qazirgi ýaqytta bul másele boiynsha ne reseilik, ne qazaqstandyq zańnamada naqty protsedýra joq. Biz bul júieni engizýdi josparlap otyrmyz. Kibersaqtandyrý iske qosylǵan kezde azamattar ótemaqy ala alady. Al ázirge jalǵyz jol – Reseide sotqa júginip, shyǵyn kelgenin dáleldeý,” – dep túsindirdi ol.
Eske salaiyq, ótken jyldyń jeltoqsanynda Sirena Travel kompaniiasy taratylǵannan keiin qazaqstandyqtardyń jeke derekteri ashyq qoljetimdi bolyp, tarap ketken edi.
Jelige 2007–2023 jyldar aralyǵyndaǵy 700 myńǵa jýyq ishki reis týraly málimetter tarady. Onda Air Astana, Scat, Qazaq Air jáne Bek Air áýe kompaniialarynyń jolaýshylaryna qatysty aqparat bolǵan.
Málimetter bazasynda sondai-aq qazaqstandyqtardyń reseilik áýe kompaniialaryndaǵy halyqaralyq reisteri týraly aqparat bar. Jariialanǵan faildarda jolaýshylardyń jeke derekteri, qujat nómirleri, telefon nómirleri men elektrondyq poshta mekenjailary kórsetilgen.
