Қазақстанда жемқорлардың ашық тізімі пайда болады, деп хабарлайды Dalanews.kz.
Қазақстанда жемқорлардың ашық тізімі енгізіледі. Бұл туралы Сыбайлас жемқорлыққа қарсы іс-қимыл агенттігі төрағасының бірінші орынбасары Ұлан Сарқұлов хабарлады.
Бүгін Мәжілісте «Қазақстан Республикасының кейбір заңнамалық актілеріне сыбайлас жемқорлыққа қарсы іс-қимыл мәселелері бойынша өзгерістер мен толықтырулар енгізу туралы» және «Қазақстан Республикасының Әкімшілік құқық бұзушылық туралы кодексіне сыбайлас жемқорлыққа қарсы іс-қимыл мәселелері бойынша өзгерістер мен толықтырулар енгізу туралы» заң жобалары қаралуда.
Аталған заң жобалары аясында елде жемқорлардың ашық реестрін енгізу жоспарланып отыр.
«Бұл – алдын алу құралы. Оның негізгі мақсаты – қоғамда сыбайлас жемқорлыққа төзбеушілікті қалыптастыру үшін қоғамдық айыптауды қолдану. Реестрге ауыр және аса ауыр сыбайлас жемқорлық қылмыстары үшін сотталған адамдар туралы мәліметтер енгізіледі. Адамды тізімге енгізудің негізі – заңды күшіне енген айыптау үкімі», – деп түсіндірді Сарқұлов Мәжіліс отырысында.
Реестрден шығару заңды күшіне енген ақтау үкімі негізінде және соттылығы жойылған жағдайда мүмкін болады.
Реестр агенттіктің сайтында жарияланады.
