Қазақстанда жыл басынан бері терроризм мен экстремизмге қатысты қылмыстар үшін 17 адам сотталды, деп хабарлайды Dalanews.kz.
Бұл туралы Ұлттық қауіпсіздік комитеті мәлімдеді.
Белгілі болғандай, сотталғандардың бірі - Алматы қаласының тұрғыны. Ол 2017 жылы шетелге кетіп, халықаралық террористік ұйымдар жағында соғыс қимылдарына қатысқан. 2025 жылы ол шетелде ұсталып, Қазақстанға экстрадицияланған. Сот оны 8 жылға бас бостандығынан айырды.
Тағы бір айыпталушы - Көкшетау қаласының тұрғыны. Ол 2013 жылдан бері шетелде жүрген және интернет арқылы терроризм мен діни экстремизмді насихаттаумен айналысқан. Ол да шетелдік арнайы қызметтердің қатысуымен ұсталып, Қазақстанға жеткізілген. Сот үкімімен 9 жыл 6 айға бас бостандығынан айырылған.
Сонымен қатар Астана, Алматы, Шымкент қалаларында, Ақмола облысында және Ұлытау облысында террористік әрекетке қатысы бар деген күдікпен 6 адам ұсталды.
Бұдан бөлек, қылмыстық-атқару жүйесі мекемелерінде жазасын өтеп жатқан тағы 4 сотталушыға жаңа айыптар тағылды. Оларға түрмеде терроризмді насихаттады және сотталғандар арасында діни араздықты қоздырды деген күдік келтіріліп отыр.
