Ұлттық банк елдегі алғашқы криптоайырбастау пунктінің қызметіне лицензия берді. Лицензияны Pax Finance компаниясы алды, деп хабарлайды dalanews.kz.
Лицензия компанияға криптовалютаны заңды түрде сатып алу, сату және сақтау қызметін көрсетуге, сондай-ақ, бөлімшелер ашып, криптоматтар орнатуға мүмкіндік береді.
Цифрлық активтер нарығына қатысушыларды лицензиялау тәртібі Қазақстанда 2026 жылғы 1 мамырдан бастап қолданысқа енгізілген еді.
Бұған дейін Мемлекет басшысы Қасым-Жомарт Тоқаев криптовалюта арқылы капиталды заңсыз шығаруға қарсы күресті күшейтуді тапсырған болатын. Жыл басынан бері елде жалпы айналымы шамамен 127 миллион АҚШ доллары болатын 130-дан аса заңсыз криптоайырбастау пунктінің қызметі тоқтатылып, тергеу аясында құны 5,3 миллион доллар болатын мүлікке тыйым салынған.
