Қаржы вице-министрі Ержан Біржанов жаңа Салық кодексі жобасында қарапайым азаматтарды декларация тапсыру міндетінен босату жоспарланып отырғанын мәлімдеді, деп хабарлайды Dalanews.kz.
Біржановтың түсіндіруінше, бастапқы декларацияны (250-нысанды) азаматтар тек бір рет тапсырады. Ал 270-нысан тек мүлік сатып алу немесе өзге де қаржылай өзгерістер болған жағдайда, жыл сайын 15 қыркүйекке дейін тапсырылады.
“Сондықтан өз табысына байланысты салықты өзі есептемейтін азаматтар декларация тапсырмайды деп шештік. Өйткені олардың салықтық міндеттемесін жұмыс беруші немесе салық агенті орындайды. Біз онсыз да әрбір қызметкер бойынша есептілік алып, оны базада сақтаймыз. Егер кімде-кім декларация тапсырмаса, оны жүйе арқылы бірден көреміз. Сол себепті 8 миллион адамға декларация тапсырудың қажеті жоқ”, — деді Ержан Біржанов.
Оның айтуынша, бүгінде Қазақстандағы сатып алулардың 87 пайызы қолма-қол ақшасыз, яғни электронды түрде жасалады. Бұл — салық органдарына қажет ақпаратты автоматты түрде алуға мүмкіндік береді.
Еске салайық, бұған дейін декларация өткізбеген 68,3 мың адамның банктік шоты бұғатталғаны туралы жазған едік.
ҚР Қаржы министрлігі Мемлекеттік кірістер комитеті 2024 жылы Қазақстанда жалпыға бірдей декларациялаудың үшінші кезеңі аяқталғанын еске салады. Осы бастама шеңберінде бизнес өкілдері — заңды тұлғалардың басшылары, құрылтайшылары мен қатысушылары, сондай-ақ дара кәсіпкерлер және олардың жұбайлары 250.00 нысаны бойынша "кіру" декларациясын тапсыра отырып, Қазақстандағы және шетелдегі өз активтерін декларациялады.
Бұдан бөлек, бұрын жалпыға бірдей декларациялау жүйесіне кірген азаматтар 270.00 нысанды кірістер мен мүлік туралы жыл сайынғы декларациясын ұсынды.
"Декларацияларды тапсыру мерзімі ағымдағы жылы 2024 жылғы 1 қаңтардан 16 қыркүйекке дейін белгіленді, бұл 8,5 айды құрады. Осы уақыт ішінде Мемлекеттік кірістер органдары декларанттарды бұқаралық ақпарат құралдары, СМС-хабарламалар және басқа да тәсілдер арқылы декларацияларды тапсыру қажеттілігі туралы белсенді түрде хабардар етті. Ақпараттық қолдауға қарамастан, кейбір салық төлеушілер белгіленген мерзімде декларация тапсырған жоқ. Мұндай жағдайларда салық органдары бұзушылықтарды жою үшін қосымша 30 жұмыс күнін бере отырып, салық заңнамасында белгіленген мерзімде жеке тұлғаларға салық есептілігін ұсынбау туралы хабарлама жібереді. Осылайша, азаматтарға декларация тапсыру үшін 10 ай уақыт берілді", - дейді МКК.
Ведомство мәліметінше, декларациялар, егер оларда салық органының коды, салық кезеңі немесе декларация жасалған күні сияқты негізгі деректер болмаса немесе декларация "өңдеуден бас тарту" мәртебесін алған болса, ұсынылмаған болып саналады. Мұндай жағдайларда салық төлеушілер декларацияны өзгерту әдісімен қайтарып алып, түзетілгенін беру арқылы бұзушылықты өз бетінше жоя алады.
"Банктік шоттар бойынша шығыс операцияларын тоқтата тұру тек дара кәсіпкерлерге және жеке практикамен айналысатын тұлғаларға ғана қатысты екенін атап өткен жөн (Салық кодексінің 118-бабы). Декларацияны уақытылы тапсыра алмаған азаматтар үшін бірінші рет ескерту түрінде әкімшілік жауапкершілік қарастырылған. Бұзушылықтар жойылғаннан кейін банктік шоттар бойынша шығыс операциялары бір жұмыс күнінен кешіктірілмей бұғаттан шешіледі", - дейді мамандар.
Бүгінгі таңда, жалпыға бірдей декларациялау бойынша декларация тапсыруға міндетті 4,8 миллион адамның ішінен декларацияны ұсынбағаны үшін мемлекеттік кіріс органдары 68,3 мың немесе 1,4% дара кәсіпкер мен жеке практикамен айналысатын тұлғалардың банктік шоттары бойынша шығыс операцияларын тоқтатты.
"Бүгінгі таңда аутқушылықтарды жойған 17,5 мыңнан астам салық төлеушінің немесе өкімдердің жалпы санының 26% бойынша - банктік шоттары бойынша бұғаттау шешілді", делінген МКК хабарламасында.
