Қазақстанда «Дипломмен – ауылға» ипотекалық бағдарламасы іске қосылды, деп хабарлайды Dalanews.kz.

Бағдарлама кімдерге арналған?

Бұл мемлекеттік бағдарлама ауылдық жерлерде жұмыс істейтін мамандарға арналған. Атап айтқанда:

Ауыл шаруашылығы саласы: агрономдар, ветеринарлар және басқа да мамандар;

Білім беру: мұғалімдер, тәрбиешілер;

Денсаулық сақтау: дәрігерлер, медбикелер;

Әлеуметтік қорғау: әлеуметтік қызметкерлер;

Мәдениет және спорт: жаттықтырушылар, мәдениет үйлері қызметкерлері;

Мемлекеттік қызмет: ауылдық округ әкімдіктерінің аппарат мамандары (әкім мен оның орынбасарларынан басқа).

Негізгі талаптар

Бағдарламаға қатысу үшін:

Соңғы 2 жылда таңдаған ауылда тұрғын үй болмауы,

Несие бойынша қарыздың болмауы,

Техникалық, кәсіби, жоғары немесе жоғары оқу орнынан кейінгі білім туралы дипломның болуы қажет.

Сонымен қатар, несие алғаннан кейін кемінде 3 жыл өз мамандығы бойынша ауылда жұмыс істеу міндеттеледі.

Қандай көмек қарастырылған?

Бағдарлама аясында:

Көшуге арналған бір реттік көтерме ақы – 100 АЕК (2025 жылы 393 200 теңге);

1% мөлшерлемемен 15 жылға дейінгі жеңілдетілген несие беріледі. Несие сомасы елді мекеннің орналасуына байланысты 2500 АЕК-ке дейін (шамамен 9,83 млн теңге) жетеді.