"Қазақмыс" корпорациясы бейбіт ереуілге шыққан кеншілермен жүргізген келіссөз барысында жалақыны екі есе көтеру мүмкін емес екенін мәлімдеді, деп хабарлайды Dalanews.kz.
“Жалақыны 100%-ға көтеру мүмкін емес. Біріншіден, бұл Қазақстандағы бүкіл өнеркәсіптің тоқтауына әкеледі. Бүгінде елімізде мұндай деңгейдегі жалақы ешбір жерде жоқ. Екіншіден, бұл ел экономикасына үлкен соққы болады. Барлығыңыз білесіздер, корпорация жалақыны көтерсе, бірден азық-түлік, жанармай бағалары өсіп, ол әлеуметтік тұрғыдан осал топтарға ауыр тиеді. Сіздердің жұмысты тоқтату туралы шешімдеріңіз біз үшін түсініксіз”, – деді жұмыс беруші тараптың өкілі.
Ол жалақы тек инфляция деңгейіне сәйкес индекстелетінін айтты.
“Үкімет инфляцияны қандай пайызбен жарияласа, корпорация сол пайызға сәйкес жалақыны индекстейді. Қазіргі болжам бойынша, бұл көрсеткіш 8,5% болуы мүмкін”, – деді компания өкілі.
Алайда шахтерлер өз талаптары орындалмайынша жұмыстарына қайта кіріспейтіндерін мәлімдеді. KazTAG редакциясына шахта ішінде өткен келіссөздер барысынан видео жолданды.
“Біз тек өзіміздің адал еңбегіміз үшін лайық ақы сұрап отырмыз. Бастамашыл топқа қысым жасалмасын. Біз көп нәрсе талап етпейміз, тек жалақыны 100%-ға көтеруді сұраймыз. 500-600 мың теңге шахтер үшін көп ақша деп ойлайсыздар ма?”, – деді шахтерлердің бірі келіссөз барысында.
Жұмыс беруші тарап жағдайды бақылау үшін жергілікті билік пен құқық қорғау органдарымен бірлесе жұмыс істейтіндерін жеткізді.
“Бұл мәселені заң аясында шешуге тырысамыз. Бірақ заң бұзушылыққа жол берілмейді. Егер заңсыз әрекет болса, оның салдары өздеріңізге байланысты”, – деді компания өкілі.
Видеода ереуілшілер бастамашыл топтың қалай құрылғаны туралы сұрақтар қойып, түсініктеме береді. Олардың айтуынша, бұл топ шахтерлердің алдыңғы жиналысынан кейін корпорация басшылығының ұсынысы бойынша құрылған. Сондай-ақ, ереуілшілер құқық қорғау органдары тарапынан қысым жасалып жатқанын жеткізді.
Шахта сыртында түсірілген тағы бір видеода жұмысшылар тарамайтындарын, алайда бейбіт келіссөздерге дайын екенін білдірді.
“Жігіттер, тәртіп бұзбай, барынша тыныштықты сақтауға тырысайық”, – деп өтінді жұмыс беруші тараптың өкілі.
Еске салайық, 17 желтоқсанда Ұлытау облысында"Қазақмыс корпорациясының"("Жезқазғантүстімет") филиалы - "ОңтүстікҚазақстан" кенішінің № 65 шахтасындаереуіл болды. 250-ден астам кенші жерастына түсуден бас тартты. Олар жалақыларын көтеру және еңбекжағдайларын жақсартуды талап етті. Бүгін, 18 желтоқсанда компанияның баспасөз қызметі аталған жайтқа қатысты түсініктеме берді.
Компания баспасөз қызметінің хабарлауынша, "2024 жылғы 17 желтоқсанда "Қазақмыс корпорациясы" ЖШС "Жезқазғантүстімет" ӨБ құрамына кіретін Оңтүстік Жезқазған кеніші мен Жыланды кенішінің қызметкерлері ұжымдық талаптар білдірген. Оңтүстік Жезқазған кенішінде жұмысшылар жалақыны екі есеге арттыру және т. б. мәселелерін атап өтті. Қызметкерлермен "Қазақмыс корпорациясы" ЖШС Бас директоры және кәсіподақ ұйымдарының өкілдері түсіндіру жұмыстарын жүргізді. Кездесу барысында олар "Жезқазғанцветмет" ӨБ-дағы ең төменгі жалақы 363 000 теңгені (МЖМБ үй-жайларын жинаушы), медианалық жалақы 650 000 теңгені, ал Ұлытау облысы бойынша медианалық жалақы 404 105 теңгені, ал жалпы Қазақстан бойынша екі есе аз және 285 677 теңгені құрайтынын атап өтті".
"Қазақмыс Корпорациясы" бұған дейін 2025 жылғы қаңтардан бастап жалақының өсуін жариялаған болатын. Индекстеу 2024 жылы Ұлттық статистика бюросы ресми түрде белгілеген инфляция деңгейіне жүргізіледі. Жалақыны 8,5%-ға арттырған кезде корпорация бойынша орташа жалақы 822 000 теңгеге дейін (2024 жылы — 730 431 теңге), ал жерасты жұмысшылары үшін — 1 303 000 теңгеге дейін (2024 жылы — 1 202 000 теңге) өседі", делінген компания хабарламасында.
"Қазақмыс корпорациясы" 2020 жылдан бастап жыл сайын жалақыны көтеріп келеді. Осы кезеңде жалақының орташа деңгейі 151%-ға – 2020 жылғы 326 196 теңгеден 2025 жылға арналған ағымдағы болжамдарға дейін көтерілді. Бұл 2,5 есеге өсуге сәйкес келеді.
Компания жалақының одан әрі күрт өсуі компания шахталарының рентабельділігіне қауіп төндіруі мүмкін екенін нақтылайды. Жалақыны көтеруден басқа, 2025 жылдан бастап 2025-2029 жылдарға арналған жаңа Ұжымдық шарт күшіне енеді. Шарт шеңберінде:
- материалдық көмек пен өтемақы мөлшерін ұлғайту;
- даму ерекшеліктері бар балалардың ата-аналарына қосымша жеңілдіктер;
- балалар демалысы бағдарламаларын кеңейту;
- барлық қызметкерлерді ерікті медициналық сақтандырумен қамту.
Компания өз жұмыскерлері үшін еңбекті жақсартудан басқа, Сәтбаев пен Жезқазған қалаларына қомақты инвестициялар жүргізуде, осылайша 2023-2024 жылдар аралығында өңірдің 10-нан астам объектісіне 30 млрд теңгеден астам инвестиция салынды.
