Украинадағы әскери қақтығыстарға қатысқан қазақстандық Петр Мирошниченко Ресейден уақытша баспана алады. Бұл туралы Ресей Ішкі істер министрлігі мәлімдеді, деп хабарлайды Dalanews.kz.
«Ресей ІІМ бұл азаматтың ел аумағында уақытша тұруына рұқсат беруге әзір. Бұл туралы бұған дейін «Восток» еріктілер бригадасының өкілдеріне хабарланған», – деп мәлімдеді ведомство.
Петр Мирошниченко бұған дейін Ресей президенті Владимир Путинге бейнеүндеу жолдап, Ресей азаматтығын алуға көмектесуді сұраған.
«Қазақстанға қайтуым мүмкін емес, өйткені ол жақта мені жалдамалы әскери қызметке қатысқаным үшін ұзақ мерзімді түрме жазасы күтіп тұр. Ал Ресейде де ресми түрде бола алмаймын, себебі маған бұл жерде кіруге тыйым салынып, елден шығару туралы шешім қабылданған», – деген еді Мирошниченко өз үндеуінде.
