Өзбекстанда электрон темекілерді (вейптерді) және никотин жеткізудің осындай жүйелерін елге әкелуге, алып шығуға, сатуға, сатып алуға және сақтауға тыйым салынды, деп хабарлайды Dalanews.kz.
Бұл норма ел президенті Шавкат Мирзиёев 27 қарашада қол қойған заңда бекітілген.
Заңнамаға енгізілген өзгерістерге сәйкес, вейптерді импорттау және сату үшін тағайындалатын ең жеңіл жаза – 300-ден 500-ге дейінгі базалық есептік бірлік (БЕБ) көлеміндегі айыппұл. Бұл 123,6 млн сумнан (шамамен $10,3 мың) 206 млн сумға ($17,3 мың) дейінгі мөлшер.
Сонымен қатар, 2 жылдан 3 жылға дейінгі мерзімге түзету жұмыстары, 3 жылдан 5 жылға дейінгі бостандықты шектеу түріндегі санкциялар қарастырылған. Ең қатаң жаза – 3 жылдан 5 жылға дейінгі мерзімге бас бостандығынан айыру.
Қазақстандағы жағдай
Айта кетейік, Қазақстанда 2024 жылғы 20 маусымнан бастап электрон темекіні әкелуге, дайындауға және сатуға тыйым салу күшіне енді. Олардың айналымы үшін қылмыстық жауапкершілік енгізілді:
1.Сатқаны үшін жаза: 200 АЕК-ке дейін айыппұл, 200 сағатқа дейін қоғамдық жұмыстар немесе 50 тәулікке дейін қамауға алу.
2.Әкелу және тарату үшін жаза: 2000 АЕК-ке дейінгі айыппұл, 600 сағатқа дейінгі қоғамдық жұмыстар, екі жылға дейінгі мерзімге шектеу немесе бас бостандығынан айыру.
3.Қылмыстық топ жасаған сол әрекеттер үшін айыппұл аса ірі мөлшерде немесе бірнеше рет: 5000 АЕК-ке дейін айыппұл, 1200 сағатқа дейін қоғамдық жұмыстар, бес жылға дейін шектеу немесе бас бостандығынан айыру.
