Қазақстанда кейбір бағыттар бойынша пойыз билеттерінің бағасы ұшақ билеттерінен жоғары болып көрінуі мүмкін. Бұл жағдайдың бірнеше себебі бар, деп хабарлайды dalanews.kz.
«Қазақстан темір жолы» ҰК» АҚ басқарма төрағасының орынбасарының айтуынша, пойыз билеттерінің бағасы жыл бойы тұрақты сақталады және маусымға байланысты өзгермейді. Биылғы жылдың 1 сәуірінен бастап билет құны 7%-ға индекстелді. Бұл көрсеткіш өткен жылғы инфляция деңгейінен (12%-дан астам) төмен.
Сонымен қатар, авиация саласында динамикалық тариф қалыптастыру жүйесі қолданылады. Яғни, ұшақ билеттерінің бағасы сұранысқа қарай өзгеріп отырады. Маусымаралық кезеңде немесе сұраныс төмен кезде әуе билеттері арзанырақ болуы мүмкін. Алайда жолаушылар саны артқан кезеңдерде олардың бағасы 70 мыңнан 100 мың теңгеге дейін жетуі ықтимал.
Маманның сөзінше, пойыз және ұшақ билеттерінің бағасын салыстырғанда жекелеген күндердегі емес, жылдық орташа көрсеткіштерді негізге алған дұрыс. Сонда ғана көлік түрлері арасындағы баға айырмашылығын объективті бағалауға болады.
