Әлгінде ғана әлеуметтік желіде "Ғылым академиясы КВИ-мен ауырған Тұңғыш президенттің қанынан коронавирусқа қарсы вакцина әзірлейді" деген қаңқу әңгіме тараған.
Ақпарат министрлігі мұны фейк деп атап, жалған ақпаратқа сенбеуге шақырды.
"Әлеуметтік желіде Назарбаевтың қаны негізінде КВИ-ге қарсы вакцина жасалады деген қауесеттің шындыққа сәйкес келмейтінін хабарлаймыз.
Тиісті органдар аталған ақпардың Қазақстан заңнамасына қаншалықты қайшы келетінін анықтап, бұдан былай мұндайға жол бермеудің амал-әдісін қарастырады.
Азаматтарды әлеуметтік желі мен интернеттегі алыпқашпа әңгімеге алданбауға және тек ресми ақпаратқа ғана сенуге шақырамыз. Жалған мәлімет таратқан азаматтар Қылмыстық кодекстің 274 бабына сай қылмыстық жауапкершілікке тартылатынын ескертеміз", – делінген министрлік мәлімдемесінде.
Айта кетелік, кеше Назарбаевтың коронавирустан толық жазылып шыққаны белгілі болды. КВИ тестті қайтара тапсырған Елбасыдан коронавирус анықталған жоқ. Елбасы елге үн қатып, жағдайының жақсы екенін хабарлады.
