Министр Аида Балаева бірқатар шенеуніктің ұсталғаны туралы ақпаратты жоққа шығарды, деп хабарлайды Dalanews.kz.
Кейбір ресми БАҚ пен анонимді телеграм-арналарда мемлекеттік қызметшілердің ұсталғаны туралы расталмаған ақпарат таратылуда.
"Ақпараттың шынайылығын тексеру міндеті, кінәсіздік презумпциясы қағидасы, сондай-ақ журналистік этика бар екенін есте сақтау қажет. "Хайп" қуып, көбіне расталмаған деректерге жүгінген кезде журналистер мұндай ақпараттың азаматтарға және олардың жақын туыстарына зиян келтіруі мүмкін екенін, олардың ар-намысы мен қадір-қасиетіне нұқсан тигізетінін, шын мәнінде жала болып табылатынын ұмытпауы тиіс", - дейді министр.
Ол кәсіби БАҚ пен журналистер сақтауы тиіс міндеттерді ұстануға шақырып, сондай-ақ жалған ақпарат таратқаны үшін әкімшілік әрі қылмыстық жауапкершілік көзделгенін еске салды.
Айта кетейік, телеграмда сыртқы істер министрі Мұрат Нұртілеу мен кәсіпкер Гаджи Гаджиевтің ұсталғаны туралы ақпарат тараған болатын.
