Маңғыстау облысында орталық аурухана қайтарылған активтер есебінен жаңғыртылуда, деп хабарлайды Dalanews.kz.
Бейнеу ауданында көпсалалы орталық аудандық аурухананың ғимаратында ауқымды күрделі жөндеу жобасы басталды. Медициналық ұйым 170-тен астам төсек-орынға есептелген және жыл сайын 320 мыңнан астам науқасты қабылдайды.
Жоба прокуратура органдары қабылдаған шаралардың нәтижесінде мемлекетке қайтарылған активтер есебінен жүзеге асырылуда.
Бүгінгі күні аудандық аурухана халықтың шұғыл және мамандандырылған медициналық көмекке деген қажеттілігін толық көлемде қамтамасыз ете алмай отыр, соның салдарынан науқастар ірі қалаларға жүгінуге мәжбүр.
2025 жылдың 1 қаңтарындағы халық санағы бойынша ауданда 68 мыңнан астам адам тұрады.
Аудан тұрғындары үшін дер кезінде және сапалы медициналық көмекке қол жеткізу ерекше маңызды. Халық санының өсуін және ауданның қарқынды дамуын ескере отырып, мекемені жаңғырту туралы шешім қабылданды.
Жоба аясында ғимараттарға күрделі жөндеу жүргізу және қайта жаңарту, жаңа құрылыстар салу, мамандандырылған бөлімшелер ашу, сондай-ақ заманауи медициналық жабдықтармен қамтамасыз ету көзделген: компьютерлік және магниттік-резонанстық томографтар, ангиографтар, эксперттік деңгейдегі УДЗ аппараттары, реанимация және операциялық блоктарға арналған құрал-жабдықтар.
Жаңартылған ауруханада инсульттік және кардиологиялық орталықтар, медициналық оңалту, травматология және ортопедия бөлімдері, сондай-ақ басқа да мамандандырылған қызметтер ашылады, қабылдау бөлімі триаж жүйесімен жабдықталады.
Бұл жобаны жүзеге асыру ауданның және көршілес елді мекендердің тұрғындарын заманауи деңгейдегі қолжетімді және сапалы медициналық көмекпен қамтамасыз етуге мүмкіндік береді.
