Мәжіліс депутаттары Қазақстанда кибералаяқтықпен күресті күшейтуді талап етті. Халық қалаулылары Бас прокуратураға, ІІМ-ге, Ұлттық банкке және Қаржы нарығын реттеу және дамыту агенттігіне депутаттық сауал жолдады, деп хабарлайды Dalanews.kz.
Депутаттарға Қарағандының 232 тұрғыны – негізінен зейнеткерлер мен әлеуметтік тұрғыдан осал азаматтар жүгінген. Олар алаяқтардың құрбаны болып, атына несие рәсімделгенін айтқан.
Жәбірленушілердің сөзінше, банктер несие рәсімдеу кезінде идентификация ережелерін өрескел бұзған: биометрия жазбаша келісімсіз жүргізілген, табыс деңгейі жасанды түрде өсіріліп көрсетілген, бірден бірнеше банктен несие алу үшін жалған ақпарат енгізілген. Сондай-ақ келісімшарттарда жалған мекенжай мен телефондар көрсетілген.
"Екінші деңгейлі банктер «банктік құпия» деген иммунитетті пайдаланып, толық ақпаратты тергеушілерге де, адвокаттарға да, жәбірленушілердің өзіне де бермейді", – делінген депутаттық сауалда.
Депутаттар келтірген мысалдардың бірі – Қарағанды тұрғыны, 66 жастағы әйел. Ол 2001 жылдан бері психоневрологиялық есепте тұрса да, атына Halyk bank пен Home Bank-те 5 миллион теңгеден астам қарыз рәсімделген.
Тағы бір оқиға көпбалалы отбасының басынан өткен: ерлі-зайыптылардың бұрыннан бар несиелері бола тұра, алаяқтар олардың атына 18,6 миллион теңгеден астам жаңа несие рәсімдеген. Ал бас ми жарақаты диагнозымен 2-топ мүгедектігі бар азаматқа банк 832 мың теңге несие берген – электронды қолтаңбасыз және тіпті мобильді телефоны болмағанына қарамастан.
