ءماجىلىس دەپۋتاتتارى قازاقستاندا كيبەرالاياقتىقپەن كۇرەستى كۇشەيتۋدى تالاپ ەتتى. حالىق قالاۋلىلارى باس پروكۋراتۋراعا، ىىم-گە، ۇلتتىق بانككە جانە قارجى نارىعىن رەتتەۋ جانە دامىتۋ اگەنتتىگىنە دەپۋتاتتىق ساۋال جولدادى، دەپ حابارلايدى Dalanews.kz.

دەپۋتاتتارعا قاراعاندىنىڭ 232 تۇرعىنى – نەگىزىنەن زەينەتكەرلەر مەن الەۋمەتتىك تۇرعىدان وسال ازاماتتار جۇگىنگەن. ولار الاياقتاردىڭ قۇربانى بولىپ، اتىنا نەسيە راسىمدەلگەنىن ايتقان.

جابىرلەنۋشىلەردىڭ سوزىنشە، بانكتەر نەسيە راسىمدەۋ كەزىندە يدەنتيفيكاسيا ەرەجەلەرىن ورەسكەل بۇزعان: بيومەتريا جازباشا كەلىسىمسىز جۇرگىزىلگەن، تابىس دەڭگەيى جاساندى تۇردە ءوسىرىلىپ كورسەتىلگەن، بىردەن بىرنەشە بانكتەن نەسيە الۋ ءۇشىن جالعان اقپارات ەنگىزىلگەن. سونداي-اق كەلىسىمشارتتاردا جالعان مەكەنجاي مەن تەلەفوندار كورسەتىلگەن.

"ەكىنشى دەڭگەيلى بانكتەر «بانكتىك قۇپيا» دەگەن يممۋنيتەتتى پايدالانىپ، تولىق اقپاراتتى تەرگەۋشىلەرگە دە، ادۆوكاتتارعا دا، جابىرلەنۋشىلەردىڭ وزىنە دە بەرمەيدى"، – دەلىنگەن دەپۋتاتتىق ساۋالدا.

دەپۋتاتتار كەلتىرگەن مىسالداردىڭ ءبىرى – قاراعاندى تۇرعىنى، 66 جاستاعى ايەل. ول 2001 جىلدان بەرى پسيحونيەۆرولوگيالىق ەسەپتە تۇرسا دا، اتىنا Halyk bank پەن Home Bank-تە 5 ميلليون تەڭگەدەن استام قارىز راسىمدەلگەن.

تاعى ءبىر وقيعا كوپبالالى وتباسىنىڭ باسىنان وتكەن: ەرلى-زايىپتىلاردىڭ بۇرىننان بار نەسيەلەرى بولا تۇرا، الاياقتار ولاردىڭ اتىنا 18،6 ميلليون تەڭگەدەن استام جاڭا نەسيە راسىمدەگەن. ال باس مي جاراقاتى دياگنوزىمەن 2-توپ مۇگەدەكتىگى بار ازاماتقا بانك 832 مىڭ تەڭگە نەسيە بەرگەن – ەلەكتروندى قولتاڭباسىز جانە ءتىپتى ءموبيلدى تەلەفونى بولماعانىنا قاراماستان.