Májilis depýtattary Qazaqstanda kiberalaiaqtyqpen kúresti kúsheitýdi talap etti. Halyq qalaýlylary Bas prokýratýraǵa, IIM-ge, Ulttyq bankke jáne Qarjy naryǵyn retteý jáne damytý agenttigine depýtattyq saýal joldady, dep habarlaidy Dalanews.kz.
Depýtattarǵa Qaraǵandynyń 232 turǵyny – negizinen zeinetkerler men áleýmettik turǵydan osal azamattar júgingen. Olar alaiaqtardyń qurbany bolyp, atyna nesie rásimdelgenin aitqan.
Jábirlenýshilerdiń sózinshe, bankter nesie rásimdeý kezinde identifikatsiia erejelerin óreskel buzǵan: biometriia jazbasha kelisimsiz júrgizilgen, tabys deńgeii jasandy túrde ósirilip kórsetilgen, birden birneshe bankten nesie alý úshin jalǵan aqparat engizilgen. Sondai-aq kelisimsharttarda jalǵan mekenjai men telefondar kórsetilgen.
"Ekinshi deńgeili bankter «banktik qupiia» degen immýnitetti paidalanyp, tolyq aqparatty tergeýshilerge de, advokattarǵa da, jábirlenýshilerdiń ózine de bermeidi", – delingen depýtattyq saýalda.
Depýtattar keltirgen mysaldardyń biri – Qaraǵandy turǵyny, 66 jastaǵy áiel. Ol 2001 jyldan beri psihonevrologiialyq esepte tursa da, atyna Halyk bank pen Home Bank-te 5 million teńgeden astam qaryz rásimdelgen.
Taǵy bir oqiǵa kópbalaly otbasynyń basynan ótken: erli-zaiyptylardyń burynnan bar nesieleri bola tura, alaiaqtar olardyń atyna 18,6 million teńgeden astam jańa nesie rásimdegen. Al bas mi jaraqaty diagnozymen 2-top múgedektigi bar azamatqa bank 832 myń teńge nesie bergen – elektrondy qoltańbasyz jáne tipti mobildi telefony bolmaǵanyna qaramastan.
