Маңғыстау облысында әскери-теңіз күштерінің оқу-жаттығуы кезінде Каспий теңізіне 19 әскери қызметшіні алып кеткен. Олардың тоғызы қаза тапты, деп хабарлайды dalanews.kz.
Қорғаныс министрлігінің мәліметінше, оқиға 24 қыркүйекте оқу-жаттығу кезінде ауа райының күрт нашарлап, желдің күшеюінен болған.
Алдын ала мәлімет бойынша, үш әскери қызметші құтқарылған. Олардың біреуі ауруханаға жатқызылды. Қалған әскери қызметшілерді іздестіру жұмыстары жалғасып жатыр.
Оқиға орнына құтқару қызметтерінің күштері мен құралдары дереу жіберілген. Іздестіру-құтқару жұмыстарына Әскери-теңіз күштерінің, Төтенше жағдайлар министрлігінің бөлімшелері, авиация және басқа да тиісті қызметтер жұмылдырылды.
Оқиғаның барлық мән-жайын анықтау және іздестіру-құтқару жұмыстарын үйлестіру үшін оқиға орнына Қорғаныс министрі, авиация генерал-лейтенанты Дәурен Қосановтың басшылығымен Қорғаныс министрлігінің комиссиясы аттанды.
Қорғаныс министрлігі қаза болған әскери қызметшілердің туған-туыстары мен жақындарына көңіл айтты. Ведомство қаза тапқандардың отбасыларына қажетті көмек пен қолдау көрсетілетінін мәлімдеді.
Іздестіру жұмыстарының барысы мен әскери қызметшілердің жағдайы туралы қосымша ақпарат деректер түсуіне және расталуына қарай беріледі. Ведомство оқиғаға қатысты тек Қорғаныс министрлігі мен басқа да мемлекеттік органдардың ресми ақпаратына сүйенуге шақырды.
