Кәсіпқой боксшы Жанқош Тұраровтың адвокаты Самат Мамұтов баспасөз конференциясында даулы сұрақтарға жауап берді, - деп хабарлайды Dalanews.kz Massaget.kz-ке сілтеп.
"Жанқоштың жағынан ондай ешқандай әрекет жасалмаған (Әнарудың отбасына хабарласып, арызды алып тастауды өтінбеген- еск.). Жанқош арыз бойынша жалған деп есептейді. Өзін тазамын деп есептейді. Кешірім сұрап немесе арызын алып тастау туралы өтініш жасауға ешқандай негіз жоқ", - деді адвокат.
Сонымен қатар, жала жабу дерегі бойынша арызданушыны сотқа беруге ниетті екенін мәлімдеді.
"Заң талаптарына сәйкес қылмыстық іс аяқталғаннан кейін сотқа жүгінуге ниетіміз бар. Себебі қазіргі таңда кінә дәлелденбеген. Тергеу аяқталғанын күтеміз", - деді ол.
Сонымен қатар, Жанқош Тұраровтың адвокаты арызданушының әкесі, танымал композитор Қалдыбек Құрманәлі ешқандай байланысқа шықпағанын айтты.
"Жоқ", - деді адвокат.
Сондай-ақ Тұраровтың адвокаты спортшыны айыптаған қызды сотқа беретінін айтты.
"Әнаруді сотқа беру үшін соталды тергеу ісі аяқталуы керек. Себебі қазір оны сотқа берсек те, соталды тергеу ісінің аяқталуын күтуіміз керек. Одан кейін біз сотқа береміз", - деді ол журналистерге өткізген пресс-конференцияда.
Сондай-ақ, ол есірткі мен ішімдікке қатысты тест тапсырылғанын айтты.
"Құқығымыз бірдей, сондықтан тек жәбірленушінің сөзі не желіде тараған ақпаратқа сүйеніп оны күдікті деп тануға болмайды. Іс бойынша дәлелдемелер жиынтығы болуы керек. Сараптамалар, бейнежазбалар болуы керек. Соталды тергеп-тексеру басталды, сараптамалар тағайындалды. Психотропты, алкогольге қатысты тест тапсырылды, бәрі таза деп көрсетілді", - дейді ол.
Сенбі, 24 тамызда боксшы Жанқош Тұраров әлеуметтік желі мен БАҚ-та қызу талқыланып жатқан даулы мәселеге қатысты тағы да мәлімдеме жасаған болатын. Себебі бұған дейін Әнару Қалдыбекқызы спортшымен қалай таныс екенін және істің мән-жайын айтқан еді.
Әнарудың айтуынша, ол Жанқош Тұраровпен 2018 жылы әлеуметтік желі арқылы танысқан.
«2018 жылы «ВКонтакте» әлеуметтік желісі арқылы маған өзі бірінші хат жазды. Менің суреттерімен лүпіл басып, үнемі хат жазып жүрді. Мен ол кезде оның үйленгенін, бала-шағасы бар екенін білген жоқпын, боксшы екенін де білген жоқпын. Әлеуметтік желіде отбасы туралы ешбір ақпарат жазбаған. Бойдақпын деп статус қойған. Содан кейін жай ғана сөйлесіп жүрдім. 2018 жылдың ақпан айында мені кездесуге шақырды. Ондай жерге жалғыз бармайтын болған соң құрбымды ертіп алдым. Группалас құрбым екеуміз кездесуге бардық, ал оның жанында көп адам болды. Содан бастап бір ай бойы маған хат жазып жүрді. Маған «сен пәк қызсың, сен таза қызсың, маған қатты ұнайсың» дейтін. Бірақ, ол кезде мен оның отбасылы адам екенін біліп, «сіз үйленген адам екенсіз, мен сізбен араласа алмаймын» дедім. «Жоқ, мен үйленген болсам да сен маған ұнайсың, мен саған ағалық қамқорлық танытқым келеді, жамандық ойламаймын» деді. Осылай күнде хат жазатын. Арада бір ай өткенде маған «әкемнің анасы, әжем қатты ауырып жатыр. Хәл үстінде. Сені көрсеткім келеді, келші» деп бір мекен-жай жіберді. Мен бірден бара алмаймын дедім. Бірақ, соның алдында, бір жарым жыл бұрын мен анамнан айырылған адам ретінде оның әжесі ауырып қалғанына қатты жаным ашыды. Сондықтан, ол мені апасының хәлін сұрауға көндірді», - дейді Әнару Қалдыбекқызы.
Спортшы Жанқош Тұраров Әнарудың осы мәлімдемесіне қатысты баспасөз конференциясын өткізбек.
"Маған қатысты сұхбат беріп жатқан адамның лайлы әңгімелері мүлдем қызық емес. Менің өмірлік ұстанымдарым, мақсаттарым мүлде басқа. Ақиқат орын алатынына сенімдімін. Соған байланысты менің заңды адвокатым баспасөз конференциясын өткізетін болып шешті", - деді ол әлеуметтік желіде.
Бұған дейін танымал қазақстандық боксшы Жанкош Тұраров «қыз зорлады» деген ақпарат тарап кетті. Мәселеге Алматы полициясы пікір білдірді.
Полицияның мәліметінше, Алматы қаласы Әуезов ауданының Полиция департаменті қылмыстық іс қозғаған.
«Сот-медициналық сараптама тағайындалды. Қазір оқиғаның мән-жайын анықтау үшін тергеу жалғасып жатыр», - деп жазылған хабарлама.
Кейін Жанқош Тұраров өзіне тағылған айыптарға жауап берді.
«3 қыз өсіріп отырған әкемін! Төсектес қыз керек болса маған зорламай-ақ келетін жағдайым бар! Қайдан шыққан жала екенін өзім де түсінбей отырмын, қазір мәселенің мән жайын анықтап, кім қандай жала тағып отырғанын анықтайтын боламын», - деді ол.
