Freedom Finance компаниясы МИА «КазТАГ»-пен арадағы дауды медиация тәртібімен реттеуге дайын екенін мәлімдеп, редакцияға соңғы ұсынысын жолдады, деп хабарлайды dalanews.kz.
Компанияның мәліметінше, соңғы уақытта Freedom Finance қызметіне қатысты шындыққа сәйкес келмейтін ақпараттың таралуына байланысты іс қоғамда кеңінен талқылануда. Осыған байланысты компания өз ұстанымын жариялап, журналистерге қатысты қатаң жауапкершілік шараларын қолдануға мүдделі емес екенін атап өтті.
Freedom Finance үшін басты мәселе – компанияның іскерлік беделін қорғау. Сондықтан компания жалған деп санайтын ақпараттардың таралуын тоқтатуды, мұндай жарияланымдарды жоюды және оларды ресми түрде теріске шығаруды талап етеді.
Компания өкілдерінің айтуынша, дәл осы талаптар бұған дейін КазТАГ-қа жолданған сотқа дейінгі талап-арызда көрсетілген. Freedom Finance қазіргі уақытта дауды медиация арқылы шешуге әлі де дайын екенін мәлімдеді.
Ұсынылған шарттарға сәйкес, КазТАГ бірқатар жарияланымдардың Freedom Finance компаниясының іскерлік беделіне нұқсан келтіргенін және шындыққа сәйкес келмейтінін мойындауы тиіс. Компанияның мәлімдеуінше, тергеу барысында ұсынылған құжаттар негізінде таралған мәліметтердің шындыққа жанаспайтыны анықталған. Сонымен қатар лингвистикалық сараптамалар аталған материалдардың теріс сипатқа ие екенін көрсеткен.
Сондай-ақ Freedom Finance «Масс-медиа туралы» заңның 38-бабына сәйкес барлық платформаларда ресми теріске шығару жариялап, даулы материалдарды алып тастауды ұсынып отыр.
Бұдан бөлек, компания медиативтік келісімге жалған ақпарат тарату және масс-медиа туралы заң талаптарын бұзу фактісін мойындау туралы тармақ енгізуді талап етеді. Freedom Finance мұның заң талаптарынан туындайтынын, себебі іс қазіргі таңда сот қарауына өткенін атап өтті.
Компания азаматтық талап қою және құқық қорғау органдарына жүгіну сияқты барлық әрекеттер КазТАГ-тың дауды сотқа дейін реттеуден бас тартуынан кейін жасалғанын мәлімдеді.
Freedom Finance өкілдері өздерінің басты мақсаты журналистерді жазалау емес, компания туралы таратылған жалған мәліметтерді заң аясында жоққа шығару екенін айтты. Сонымен қатар компания бұқаралық ақпарат құралдарын ақпараттың нақтылығы мен объективтілігін сақтауға шақырып, дауды медиация арқылы шешуге әзір екенін тағы да растады.
