Мемлекет басшысының бастамасымен Абай облысы Жаңасемей ауданы Шүлбі кентінде өтіп жатқан «Таза Қазақстан» республикалық акциясының «Мөлдір бұлақ» апталығы «Ертіс – достық өзені» акциясынан басталды. Аудан басшылығы, кент тұрғындары, үкіметтік емес ұйымдар, ұлттық орталықтар, жастар, мектеп түлектері, мекеме қызметкерлері және зиялы қауымның қатысуымен кент көшелері мен Ертіс өзенінің жағасында сенбілік өтті, деп хабарлайды Dalanews.kz. 

Шүлбі кенті ақсақалдар кеңесінің мүшесі Бейсен Лепсібаев жиналғандарға алғысын білдіріп, бастама бір реттік акция болмауы тиіс екенін айтты.

-«Таза Қазақстан» акциясын өткізудегі мақсат – табиғатқа ұқыпты қарауды қалыптастыру, елді мекендерді абаттандыруды, көгалдандыруды тұрақты жүргізу. Бұл – біздің ұлттық құндылықтарымыздың бейнесі. Халқымыздың бір шаңырақ астындағы достығы мен өзара түсіністігі жалғасып, еліміздегі бейбітшілік әрқашан берік болсын, әрқашан бірлік болсын, -деді еңбек ардагері.

Бұл күні акцияға қатысушылар 200-ден астам ағаш көшеттерін отырғызып, орталық көшелер мен Ертіс өзенінің жағалауына экологиялық тазалау жүргізді. Акцияға 300-ден астам адам қатысты. Арнайы техниканың көмегімен 5 тоннаға жуық қоқыс шығарылды.

-«Мөлдір бұлақ» апталығы біздің ауданда өтуде. Осы апта – «Таза Қазақстан» акциясының бір бөлігі және біз де оған қатысуға шешім қабылдадық. Көшелер мен аумақтарды тазалауда ғана емес, қарттарға да көмектесіп, жастарға үлгі көрсетеміз, - деді Жастар кеңесінің мүшесі Айнұр Сатыбалдинова.

Мемлекет басшысы ұсынған бастаманы Жаңасемей ауданының жастары Бородулиха ауданының жастарына жолдап, табиғатқа ұқыпты қарауға шақырды.

Облыста барлығы 1 068 су ағындары мен өзендер, 55 көл, сондай-ақ 95 гидротехникалық құрылыстар бар.