Экс-мәдениет және спорт министрі Ерлан Қожағапановпен бірге сотталған кәсіпкер Ләззат Көккөзова өзін негізсіз соттады деп есептеп, үкімнің күшін жоюды сұрады, деп хабарлайды Dalanews.kz.
Ол қазіргі таңда үш айдан бері қамауда, бірақ не үшін жазаға тартылғанын түсінбейтінін айтады.
Көккөзованың айтуынша, айыптаудың негізі – кәсіпкердің келісімшарт бойынша пайда көрмеуі тиіс деген түсінікке сүйенген. Тергеу нұсқасы бойынша, барлық қаражат тек іс-шара шығындарын өтеуге жұмсалуы керек болған.
"Біз ұйымдастырған форум техникалық жағынан дамыған, интерактивті әрі ауқымды болуы қажет еді. Тапсырыс берушілердің талабы осы еді. Нәтижесінде, барлық тарап біздің коммерциялық ұсынысты бірауыздан қолдады. Алайда тергеу бұл шешімді де заң бұзушылық деп санап отыр", – деді Көккөзова.
Айта кетейік, бұған дейін Астанада бұрынғы мәдениет вице-министрі Ерлан Қожағапановтың ісі бойынша апелляциялық сот отырысы болған еді.
Экс-шенеунік 2018 жылы Қазақстан мен Ресей арасындағы XV ынтымақтастық форумын ұйымдастыру кезінде қызметтік өкілетін теріс пайдаланды деген айыппен 3 жылға бас бостандығынан айырылған болатын. Ал SUCCESS агенттігінің бас директоры Ляззат Көкқозова аса ірі көлемдегі алаяқтық үшін 5 жылға сотталған еді. Екі тарап та үкімге қарсы шағым түсірді.
Апелляциялық тыңдалымда Ерлан Қожағапановтың өзі, оның қызы Жамиля (қоғамдық қорғаушы ретінде) және Көкқозованың апасы Перизат Бектұрғанова сөз сөйледі.
Қожағапанов өзіне тағылған айып негізсіз екенін айтып, бірінші сатыдағы сот шешімін күшін жоюды сұрады. Ал қызы Жамиля тергеу кезінде құқық бұзушылықтар болғанын алға тартты.
"Сегіз-тоғыз тергеушіден құралған топ үйімізге заңсыз кіріп, мүлікті қиратып тастады. Олар анамды әйнек есікке соғып, үйге кіруге әрекет етті. Ешқайсысы өзін таныстырған жоқ, қаулы да көрсеткен жоқ. Мен шынымен бізді тонауға келді деп ойладым. Олар азаматты қорғауға тиіс орган ретінде емес, қарақшылардай келді", - деді ол.
Көкқозова процеске қатыспады
Апелляцияға Көкқозованың өзі қатыстырылған жоқ, себебі прокуратура жазаны қатаңдатуды тек Қожағапановқа қатысты талап етіп отыр. Осыған байланысты Перизат Бектұрғанова соттан әпкесін тыңдауға мүмкіндік беруді өтінді.
"Сіңлімді басқа қатысушылардың пікірін есту мүмкіндігінен айырды. Оның өз ойын жеткізуіне де жол берілмей отыр. Сондықтан одан өз атынан сөз сөйлеу құқығын беруін сұраймын", - деді ол.
Алайда сот бұл өтінішті қанағаттандырмады.
Оның сөзіне қарағанда, форумды ұйымдастыруға тағы екі компания үміткер болған, алайда олардың ұсыныстары техникалық талаптарға сай келмегендіктен қабылданбаған
