ەكس-مادەنيەت جانە سپورت ءمينيسترى ەرلان قوجاعاپانوۆپەن بىرگە سوتتالعان كاسىپكەر ءلاززات كوككوزوۆا ءوزىن نەگىزسىز سوتتادى دەپ ەسەپتەپ، ۇكىمنىڭ كۇشىن جويۋدى سۇرادى، دەپ حابارلايدى Dalanews.kz.

ول قازىرگى تاڭدا ءۇش ايدان بەرى قاماۋدا، ءبىراق نە ءۇشىن جازاعا تارتىلعانىن تۇسىنبەيتىنىن ايتادى.

كوككوزوۆانىڭ ايتۋىنشا، ايىپتاۋدىڭ نەگىزى – كاسىپكەردىڭ كەلىسىمشارت بويىنشا پايدا كورمەۋى ءتيىس دەگەن تۇسىنىككە سۇيەنگەن. تەرگەۋ نۇسقاسى بويىنشا، بارلىق قاراجات تەك ءىس-شارا شىعىندارىن وتەۋگە جۇمسالۋى كەرەك بولعان.

"ءبىز ۇيىمداستىرعان فورۋم تەحنيكالىق جاعىنان دامىعان، ينتەراكتيۆتى ءارى اۋقىمدى بولۋى قاجەت ەدى. تاپسىرىس بەرۋشىلەردىڭ تالابى وسى ەدى. ناتيجەسىندە، بارلىق تاراپ ءبىزدىڭ كوممەرسيالىق ۇسىنىستى ءبىراۋىزدان قولدادى. الايدا تەرگەۋ بۇل شەشىمدى دە زاڭ بۇزۋشىلىق دەپ ساناپ وتىر"، – دەدى كوككوزوۆا.

ايتا كەتەيىك، بۇعان دەيىن استانادا بۇرىنعى مادەنيەت ۆيسە-مينيسترى ەرلان قوجاعاپانوۆتىڭ ءىسى بويىنشا اپەللياسيالىق سوت وتىرىسى بولعان ەدى.  

ەكس-شەنەۋنىك 2018 جىلى قازاقستان مەن رەسەي اراسىنداعى XV ىنتىماقتاستىق فورۋمىن ۇيىمداستىرۋ كەزىندە قىزمەتتىك وكىلەتىن تەرىس پايدالاندى دەگەن ايىپپەن 3 جىلعا باس بوستاندىعىنان ايىرىلعان بولاتىن. ال SUCCESS اگەنتتىگىنىڭ باس ديرەكتورى لياززات كوكقوزوۆا اسا ءىرى كولەمدەگى الاياقتىق ءۇشىن 5 جىلعا سوتتالعان ەدى. ەكى تاراپ تا ۇكىمگە قارسى شاعىم ءتۇسىردى.

اپەللياسيالىق تىڭدالىمدا ەرلان قوجاعاپانوۆتىڭ ءوزى، ونىڭ قىزى جاميليا (قوعامدىق قورعاۋشى رەتىندە) جانە كوكقوزوۆانىڭ اپاسى پەريزات بەكتۇرعانوۆا ءسوز سويلەدى.

قوجاعاپانوۆ وزىنە تاعىلعان ايىپ نەگىزسىز ەكەنىن ايتىپ، ءبىرىنشى ساتىداعى سوت شەشىمىن كۇشىن جويۋدى سۇرادى. ال قىزى جاميليا تەرگەۋ كەزىندە قۇقىق بۇزۋشىلىقتار بولعانىن العا تارتتى.

"سەگىز-توعىز تەرگەۋشىدەن قۇرالعان توپ ۇيىمىزگە زاڭسىز كىرىپ، مۇلىكتى قيراتىپ تاستادى. ولار انامدى اينەك ەسىككە سوعىپ، ۇيگە كىرۋگە ارەكەت ەتتى. ەشقايسىسى ءوزىن تانىستىرعان جوق، قاۋلى دا كورسەتكەن جوق. مەن شىنىمەن ءبىزدى توناۋعا كەلدى دەپ ويلادىم. ولار ازاماتتى قورعاۋعا ءتيىس ورگان رەتىندە ەمەس، قاراقشىلارداي كەلدى"، - دەدى ول.

كوكقوزوۆا پروسەسكە قاتىسپادى

اپەللياسياعا كوكقوزوۆانىڭ ءوزى قاتىستىرىلعان جوق، سەبەبى پروكۋراتۋرا جازانى قاتاڭداتۋدى تەك قوجاعاپانوۆقا قاتىستى تالاپ ەتىپ وتىر. وسىعان بايلانىستى پەريزات بەكتۇرعانوۆا سوتتان اپكەسىن تىڭداۋعا مۇمكىندىك بەرۋدى ءوتىندى.

"ءسىڭلىمدى باسقا قاتىسۋشىلاردىڭ پىكىرىن ەستۋ مۇمكىندىگىنەن ايىردى. ونىڭ ءوز ويىن جەتكىزۋىنە دە جول بەرىلمەي وتىر. سوندىقتان ودان ءوز اتىنان ءسوز سويلەۋ قۇقىعىن بەرۋىن سۇرايمىن"، - دەدى ول.

الايدا سوت بۇل ءوتىنىشتى قاناعاتتاندىرمادى.

ونىڭ سوزىنە قاراعاندا، فورۋمدى ۇيىمداستىرۋعا تاعى ەكى كومپانيا ۇمىتكەر بولعان، الايدا ولاردىڭ ۇسىنىستارى تەحنيكالىق تالاپتارعا ساي كەلمەگەندىكتەن قابىلدانباعان