Дәурен Қосанов Қорғаныс министрі болып тағайындалды, деп хабарлайды Dalanews.kz. 

"Мемлекет басшысының Жарлығымен Дәурен Жұматайұлы Қосанов Қазақстан Республикасының Қорғаныс министрі болып тағайындалды, ол бұрынғы атқарған лауазымынан босатылды", - делінген хабарламада. 

Бұл қызметті атқарған Руслан Жақсылықов лауазымынан босатылды. 

Айта кетейік, Қосанов 1969 жылы Павлодар облысында дүниеге келген. 1990 жылы Армавир жоғары әскери авиациялық ұшқыштар училищесін аяқтаған. Содан кейін әскери-әуе академиясына оқуға түскен. Атап айтқанда Ю.А.Гагарин атындағы әскери-әуе академиясын 2005 жылы аяқтаған болса, Ресей Федерациясы Қарулы Күштері Бас штабының Әскери академиясын 2013 жылы тәмамдаған.

Қызметін Үшарал жауынгерлік полкінен бастаған. Содан кейін Талдықорғандағы «Су-27» эскадрильясының командирі, Қарағанды авиабазасы штабының бастығы, Шымкент авиабазасының командирі болған.

Ал 2013 жылы Қазақстан Республикасы Қарулы Күштері Әуе қорғанысы күштері Әскери-әуе күштерінің қолбасшысы болып тағайындалған.

2019 жылы бұл қызметінен босатылып, Ақтөбе қаласындағы Әуе қорғанысы күштері Әскери институтының бастығы болып тағайындалған.

2022 жылдың қазанында Қазақстан Республикасы Қарулы Күштері Әуе қорғанысы күштері бас штабы бастығының бірінші орынбасары, ал екі айдан соң, Әуе қорғанысы күштерінің бас қолбасшысы болып тағайындалған.

2024 жылы оған авиация генерал-лейтенанты атағы берілген.