Әйелін өлтірді деп айыпталып отырған Қуандық Бишімбаевтың ісіне қатысты сот отырысы жалғасып жатыр. Бүгінгі сот отырысы Бишімбаев жауап беруден басталды, - деп хабарлайды Dalanews.kz.
Бишімбаев дәретханада болған жайттар туралы айтты.
"Ол "маған берген сыйлықтарыңа ішің ашитын шығар" деді. "Олар маған неге керек?" дедім. "Бәрін қайтарамын" деді. "Қайтарудың қажеті жоқ, керек болмаса, лақтырып таста" дедім. Сол сәтте оған не болғанын білмеймін. Ол маған қарама-қарсы отырды. Менің көзімше сырғасын, неке жүзігін, сағатын, білезіктерін шеше бастады да, дәретханаға лақтырып тастады. Бәрін шын жүрекпен сыйлағанмын. Мен таңғалдым, әрекеттеріне қарап, сөйлей алмай қалдым. Не істерімді білмедім. "Ішетін бірдеңе әкелейін" деп дәретханадан шығып кеттім. "Иә, алып кел" деді", - деді ол.
Бишімбаевтың айтуынша, келген кезде есік жабық екенін көрген.
"...Салтанат есікті іштен жауып алған, соққының дауыстары естіліп жатты. Мен есікті қаға бастадым. "Салта, Салта, есікті аш" дедім. Ол естімеген болуы керек. Мен есікті жұдырықпен соға бастадым. Ол жүгіріп келіп, есікті қағып жатқанымды естіп, мені балағаттай бастады. "Сен мені осындай күйге жеткіздің" деді. Мен түсінбедім. ...Менде де агрессия пайда болды. ...Мен штативті алып, есікті ұра бастадым. Содан кейін есікте тесік пайда болды, кейін есікті іштен ашты. Ол мені балағаттай бастады, мен де оны боқтап айғайладым. Сөйтіп, жанжал басталды, ол мені ұра бастады, көйлегімді жыртып жіберді, мен оны ұстап алып, итеріп жібердім, қабырғаға соғылды. "Сабыр сақта" дедім. Ол маған қайта келе жатқанда, мен де оның жейдесін жыртып жібердім. Ол ашуланды. Жейдесін шешіп тастады. Оның үстіндегі киімнің бәрі 8-і күні түс кезінде концертке барар алдында сатып алынған еді. Маған киімдерін лақтыра бастады. Мен оны шапалақпен ұрып жібердім, ол кейін шегінді. Бәрі өте тез болды. Ол бір кезде "шалбарымды да шешемін" деді. Мен арқасынан ұстап алдым", - деді ол.
27 наурызда экс-министр Қуандық Бишімбаевтың ісі бойынша алқабилер таңдалған еді. Алқабилер алқасына 12 адам іріктелді: 10 – негізгі құрам, 2 – қосалқы. Содан кейін ашық сот отырыстары басталды.
Сонымен қатар, Қуандық Бишімбаев сотта Салтанат Нүкенованы аса қатыгездікпен өлтіргенін мойындамады. Бұл оқиға 2023 жылы 9 қарашада Астана қаласындағы BAU мейрамханасында болды.
Сот отырыстарының бірінде Қуандық Бишімбаев Салтанат Нүкеновамен қалай танысқанын да айтты.
"Мен оны Instagram-нан көрдім. Оған астрологиялық болжамға барған қыз астрологтар туралы айтты. Маған астрология қызық болды. Одан көрсетуін сұрадым. Танысым Instagram-нан танымал астролог деп көрсетті. Әдемі қыз екенін көрдім, Instgram-ын қарап шықтым. Оның жігіті бар екенін де көрдім. 2022 жылы мамырдың аяғы еді. Танысым жігіті бар екенін, үйленгелі жатқанын айтты. ...Біраз уақыт сырттай ғана бақыладым. Бір жолы оның қабылдауына жазылғым келді. Бірақ көмекшісі онлайн түрде де, тірілей де ер адамдарды қабылдамайтынын айтты.
Тамыздың аяғында сол қыз (танысы - еск.) той болмайтынын, (Салтанат - еск.) тұрмысқа шыққалы жатқан жігітімен айрылысқанын жеткізді. Танысуға мүмкіндік бар екенін түсіндім. Камила деген қыздан астрологиялық болжамға жазылуын өтіндім. Ал әңгіме барысында "досым бар, оның да келгісі келеді" деп айтуын өтіндім. Маған танысу, бір жағынан астрология туралы білу қызық болды. Камила Салтанаттың қабылдауына барған. Олар достасып кеткен. Бір-біріне қыздарға қатысты оқиғаларын айта бастаған. Салтанат жігітімен айрылысқанын да айтқан. Менің дос қызым "осындай адам бар, сені Instagram-да көрген, танысқысы келеді" деген. Камиламен телефонмен сөйлесіп жатқанда, "өзің сөйлесіп көргің келе ме, жанымда отыр" деді. Мен телефон арқылы танысып, амандастым. Салтанат "сіз келген кезде астрологиялық болжам өткізе аламын" деді. Кейін Қазақстанға келдім.
Салтанат ұзақ уақыт астрологиялық болжамды өткізгісі келмеді. Содан соң оған ашығын жаздым. "Шынын айтсам, болжам қызық емес, сіз маған қатты ұнап қалдыңыз, танысып көргім келеді, кешкі асқа шақырсам" дедім. Ол 1-2 күн жауап бермеді. Үшінші күні "кездесе аламыз" деді. 6 қыркүйек болуы керек, біз кездестік", - деді Бишімбаев.
