Áıelin óltirdi dep aıyptalyp otyrǵan Qýandyq Bıshimbaevtyń isine qatysty sot otyrysy jalǵasyp jatyr. Búgingi sot otyrysy Bıshimbaev jaýap berýden bastaldy, - dep habarlaıdy Dalanews.kz.
Bıshimbaev dárethanada bolǵan jaıttar týraly aıtty.
"Ol "maǵan bergen syılyqtaryńa ishiń ashıtyn shyǵar" dedi. "Olar maǵan nege kerek?" dedim. "Bárin qaıtaramyn" dedi. "Qaıtarýdyń qajeti joq, kerek bolmasa, laqtyryp tasta" dedim. Sol sátte oǵan ne bolǵanyn bilmeımin. Ol maǵan qarama-qarsy otyrdy. Meniń kózimshe syrǵasyn, neke júzigin, saǵatyn, bilezikterin sheshe bastady da, dárethanaǵa laqtyryp tastady. Bárin shyn júrekpen syılaǵanmyn. Men tańǵaldym, áreketterine qarap, sóıleı almaı qaldym. Ne isterimdi bilmedim. "İshetin birdeńe ákeleıin" dep dárethanadan shyǵyp kettim. "Iá, alyp kel" dedi", - dedi ol.
Bıshimbaevtyń aıtýynsha, kelgen kezde esik jabyq ekenin kórgen.
"...Saltanat esikti ishten jaýyp alǵan, soqqynyń daýystary estilip jatty. Men esikti qaǵa bastadym. "Salta, Salta, esikti ash" dedim. Ol estimegen bolýy kerek. Men esikti judyryqpen soǵa bastadym. Ol júgirip kelip, esikti qaǵyp jatqanymdy estip, meni balaǵattaı bastady. "Sen meni osyndaı kúıge jetkizdiń" dedi. Men túsinbedim. ...Mende de agresıa paıda boldy. ...Men shtatıvti alyp, esikti ura bastadym. Sodan keıin esikte tesik paıda boldy, keıin esikti ishten ashty. Ol meni balaǵattaı bastady, men de ony boqtap aıǵaıladym. Sóıtip, janjal bastaldy, ol meni ura bastady, kóılegimdi jyrtyp jiberdi, men ony ustap alyp, ıterip jiberdim, qabyrǵaǵa soǵyldy. "Sabyr saqta" dedim. Ol maǵan qaıta kele jatqanda, men de onyń jeıdesin jyrtyp jiberdim. Ol ashýlandy. Jeıdesin sheship tastady. Onyń ústindegi kıimniń bári 8-i kúni tús kezinde konsertke barar aldynda satyp alynǵan edi. Maǵan kıimderin laqtyra bastady. Men ony shapalaqpen uryp jiberdim, ol keıin shegindi. Bári óte tez boldy. Ol bir kezde "shalbarymdy da sheshemin" dedi. Men arqasynan ustap aldym", - dedi ol.
27 naýryzda eks-mınıstr Qýandyq Bıshimbaevtyń isi boıynsha alqabıler tańdalǵan edi. Alqabıler alqasyna 12 adam irikteldi: 10 – negizgi quram, 2 – qosalqy. Sodan keıin ashyq sot otyrystary bastaldy.
Sonymen qatar, Qýandyq Bıshimbaev sotta Saltanat Núkenovany asa qatygezdikpen óltirgenin moıyndamady. Bul oqıǵa 2023 jyly 9 qarashada Astana qalasyndaǵy BAU meıramhanasynda boldy.
Sot otyrystarynyń birinde Qýandyq Bıshimbaev Saltanat Núkenovamen qalaı tanysqanyn da aıtty.
"Men ony Instagram-nan kórdim. Oǵan astrologıalyq boljamǵa barǵan qyz astrologtar týraly aıtty. Maǵan astrologıa qyzyq boldy. Odan kórsetýin suradym. Tanysym Instagram-nan tanymal astrolog dep kórsetti. Ádemi qyz ekenin kórdim, Instgram-yn qarap shyqtym. Onyń jigiti bar ekenin de kórdim. 2022 jyly mamyrdyń aıaǵy edi. Tanysym jigiti bar ekenin, úılengeli jatqanyn aıtty. ...Biraz ýaqyt syrttaı ǵana baqyladym. Bir joly onyń qabyldaýyna jazylǵym keldi. Biraq kómekshisi onlaın túrde de, tirileı de er adamdardy qabyldamaıtynyn aıtty.
Tamyzdyń aıaǵynda sol qyz (tanysy - esk.) toı bolmaıtynyn, (Saltanat - esk.) turmysqa shyqqaly jatqan jigitimen aırylysqanyn jetkizdi. Tanysýǵa múmkindik bar ekenin túsindim. Kamıla degen qyzdan astrologıalyq boljamǵa jazylýyn ótindim. Al áńgime barysynda "dosym bar, onyń da kelgisi keledi" dep aıtýyn ótindim. Maǵan tanysý, bir jaǵynan astrologıa týraly bilý qyzyq boldy. Kamıla Saltanattyń qabyldaýyna barǵan. Olar dostasyp ketken. Bir-birine qyzdarǵa qatysty oqıǵalaryn aıta bastaǵan. Saltanat jigitimen aırylysqanyn da aıtqan. Meniń dos qyzym "osyndaı adam bar, seni Instagram-da kórgen, tanysqysy keledi" degen. Kamılamen telefonmen sóılesip jatqanda, "óziń sóılesip kórgiń kele me, janymda otyr" dedi. Men telefon arqyly tanysyp, amandastym. Saltanat "siz kelgen kezde astrologıalyq boljam ótkize alamyn" dedi. Keıin Qazaqstanǵa keldim.
Saltanat uzaq ýaqyt astrologıalyq boljamdy ótkizgisi kelmedi. Sodan soń oǵan ashyǵyn jazdym. "Shynyn aıtsam, boljam qyzyq emes, siz maǵan qatty unap qaldyńyz, tanysyp kórgim keledi, keshki asqa shaqyrsam" dedim. Ol 1-2 kún jaýap bermedi. Úshinshi kúni "kezdese alamyz" dedi. 6 qyrkúıek bolýy kerek, biz kezdestik", - dedi Bıshimbaev.
