Кеше, 26 желтоқсанда кешкісін Ақтауда арнайы өткізілген баспасөз мәслихатында премьер-министрдің орынбасары Қанат Бозымбаев ұшақтың апатқа ұшырауына не себеп болғандығы туралы мерзімінен бұрын түрлі нұсқалар айтылып қалып жатқанын айтты, деп жазады Dalanews.kz Zakon.kz-ға сілтеме жасап.
"...Қазір бірқатар сараптамалар, соның ішінде зерттеулер тағайындалды. Нәтижесі шыққанға дейін ештеңе айта алмаймыз немесе қорытынды жасамаймыз. Тергеу жүріп жатыр. Біз Ресейден де, Әзірбайжаннан да ресми болжам түрінде ешқандай ақпарат алған жоқпыз", - деді ұшақ апатын тергеу жөніндегі арнайы комиссияның басшысы.
Сондай-ақ, ол Ресей мен Әзірбайжанның құқық қорғау органдары криминалистикалық тергеуге жіберілмейтінін айтты (ҚР ҚІЖК-ге сәйкес), бірақ олар әуе апатын тергеуге жіберілетін болады.
Бозымбаев тергеу қорытындылары жарияланғанда ғана апат себебі айтылатынын, ал оған дейінгі түрлі долбарлар тек алып-қашпа сөз болатынын нақтылады.
Бұған дейін ҚР ТЖМ баспасөз қызметі әзірбайжан әуе компаниясына тиесілі ұшақ апатынан қаза тапқандардың тізімін жариялаған болатын. Қайғылы оқиға 25 желтоқсанда түске қарай болды. Бакуден Грозныйға бағыт алған жолаушылар ұшағы Ақтау әуежайының маңында апатқа ұшырады. Соңғы ақпарат бойынша, 67 адамның 29-ы аман қалды, 38 жолаушы қаза тапты, олардың ішінде ұшақ экипажы да бар. Ұшақта Қазақстанның алты азаматы болғаны белгілі болды, өкінішке қарай олардың барлығы мерт болды. Оқиға орнынан ұшақтың екі "қара жәшігі" табылды. Көлік министрі апаттың хрологиясын жариялады. Ол ұшақты жасап шыққан Бразилия компаниясының мамандары келмейінше, ашылмайтыны айтылады. Сондай-ақ ұшақ апаты кезінде қаза тапқан алты қазақстандықтың отбасыларына қандай көмек түрлері көрсетілетіні белгілі болды.
