Еңбек және әлеуметтік қорғау вице-министрі Ақмәди Сарбасов Ақтауда өткен баспасөз мәслихатында әуе апатынан қаза тапқан қазақстандықтардың отбасына қандай көмек көрсетілетінін баяндады, деп хабарлайды Dalanews.kz.

Оның айтуынша, марқұмдардың жақындарына кепілдендірілген мемлекеттік төлемдермен қатар, қосымша қолдау да көрсетіледі.

“Біз жергілікті құрылымдар арқылы демеушілер мен жұмыс берушілермен бірлесіп жұмыс істеп жатырмыз. Әрине, бір реттік көмек қарастырылған, оның нақты көлемі анықталу үстінде”, – деді Сарбасов.

Министрдің мәліметінше, республикалық бюджеттен кепілдендірілген төлем барлық отбасыға беріледі.

“Асыраушысынан айырылғандарға 138 мың теңге көлемінде жәрдемақы төленеді. Сонымен қатар Мемлекеттік әлеуметтік сақтандыру қоры арқылы 257 мың теңге төленеді. Бір реттік төлем мөлшері 5 миллион теңге болады”, – деп толықтырды ол.

Еске салайық, 25 желтоқсанда Ақтау маңында ұшақ құлады. Осыған байланысты ТЖМ түсініктеме берді. 

"Ақтауда ұшақ құлаған орынға Қазақстан ТЖМ жеке құрамынан 52 адам және 11 бірлік техникасы барды. Оқиға орнына келген бойда әуе кемесі жанып жатты. Құтқару бөлімшелері өртті сөндіруге кірісті", - деді олар. 

Әзеібайжандық БАҚ-тың хабарлауынша, бортта 67 жолаушы және 5 экипаж мүшесі болған.