Ақтауда 13 жастағы ұлынан айырылған Жұлдыз Азанова Денсаулық сақтау министрлігінен жауап талап етіп, Астанаға арнайы барды. Анасы министр Ақмарал Әлназаровамен жеке кездесіп, баласының өліміне қатысты өз сауалдарына нақты жауап алғысы келеді, деп хабарлайды dalanews.kz.
Жұлдыз Азанова 6 тамыз күні таңертең Астанаға ұшып келген. Алайда министрмен кездесудің нақты күні әлі белгісіз.
«Бұл кездесу мүлдем болмай қала ма деп қорқамын. Сондықтан жағдайға қоғамның назарын аудару үшін видео түсіруге шешім қабылдадым. Маған келесі сәрсенбі күні нақты жауап беруге уәде етті», – дейді Жұлдыз Азанова.
Бұған дейін анаға Денсаулық сақтау вице-министрімен кездесу ұсынылған. Бірақ ол бұл ұсыныстан бас тартып, министрдің өзімен сөйлесуді талап еткен.
Қазір Жұлдыз Азанова Бурабайда болып, министрліктен нақты жауап күтуде.
Вице-министрдің Маңғыстауға сапарына қатысты сұрақ
Жұлдыз Азанова Денсаулық сақтау вице-министрі Манас Рамазановтың Маңғыстау облысына жасаған жұмыс сапарына да қатысты пікір білдірді.
Оның айтуынша, вице-министр жұмыс сапары кезінде өзі сұрақ қойып отырған бірнеше медициналық мекемеге бармаған.
Анасының бұл мәселеге қатысты да министрлікке қоятын сұрақтары бар.
Бәрі қаңтарда басталған
Жұлдыз Азанованың отбасының оқиғасы биыл сәуір айында қоғамға белгілі болды.
Әйелдің айтуынша, 13 жастағы ұлының денсаулығы қаңтар айында күрт нашарлаған. Баланың іші қатты ауырып, оны аппендицит деген күдікпен облыстық балалар ауруханасына жеткізген.
Алайда бірнеше сағат бақылауда болғаннан кейін аппендицит диагнозы расталмай, жасөспірім үйіне жіберілген. Бірақ ішінің ауруы тоқтамаған. Кейін дене қызуы да көтерілген.
Келесі бірнеше айда анасы баласын бірнеше рет дәрігерлерге көрсеткен. Алайда нақты диагноз қойылмаған.
Ақыры бала ауруханаға жатқызылып, операция жасалған кезде аппендикстің жарылып кеткені анықталған. Соның салдарынан инфекция іш қуысына тарап кеткен.
19 ақпанда жасөспірім санитарлық авиациямен Алматыға жеткізілді. Ғылыми педиатрия және балалар хирургиясы орталығының дәрігерлері оның өмірін сақтап қалу үшін екі айға жуық күресті.
Өкінішке қарай, 13 сәуірде жасөспірім қайтыс болды.
Енді оның анасы баласының өліміне қатысты бірқатар сұраққа жауап алғысы келеді. Сол үшін ол Денсаулық сақтау министрінің жеке қабылдауына кіруге табанды түрде әрекет жасап жатыр.
