Мемлекет басшысы Тәжікстан президенті Эмомали Рахмонмен кездесу өткізді, деп хабарлайды Dalanews.kz.
Қасым-Жомарт Тоқаев Өңірлік экологиялық саммитке және Халықаралық Аралды құтқару қоры құрылтайшы мемлекеттері кеңесінің отырысына қатысу үшін Астанаға келген Тәжікстан президенті Эмомали Рахмонмен кездесті.
Мемлекеттер басшылары қазақ-тәжік қарым-қатынасының қазіргі жай-күйі мен перспективасын талқылап, екі ел арасындағы стратегиялық серіктестік деңгейін көтеруге келісті.
Әңгімелесу барысында сауда-экономика және су-энергетика салаларындағы ынтымақтастыққа ерекше назар аударылды.
Тараптар бұған дейін жоғары деңгейде қол жеткізілген уағдаластықтарды толық іске асыру маңызды екенін атап өтті.
Сондай-ақ, Қасым-Жомарт Тоқаев пен Эмомали Рахмон өңірлік және халықаралық күн тәртібіндегі өзекті мәселелер жөнінде пікір алмасты.
Сонымен қатар, Өзбекстан президенті Шавкат Мирзиёев те өңірлік экологиялық саммитке қатысу үшін Астанаға келді.
Одан бөлек елордаға Қырғызстан, Түрікменстан, сондай-ақ, Тәжікстан және Армения президенттері келген болатын.
