Экипаж алғашқы әсерін Orion ғарыш кемесінің бортынан тікелей эфир кезінде бөлісті.

Астронавтардың сөзінше, бұл көрініс жер тұрғындары үйренген Ай бейнесінен айтарлықтай өзгеше. NASA ұшу кезінде түсірілген әсерлі суретті де жариялады. Кадрда Айдың екі беті қатар көрінеді: оң жағында бізге таныс қара дақтары бар беті, сол жағында құпияға толы арғы жағы.

Суреттен Ориентале кратері де байқалады, ол - Айдағы ең ірі кратерлердің бірі. Оның диаметрі шамамен 965 шақырымға жетеді және спутниктің екі бөлігін де қамтиды.

NASA мәліметінше, Artemis II экипажы осы алып кратерді толық көрген алғашқы адамдар ретінде тарихқа енді.

Еске салайық, бұған дейін Artemis II миссиясының экипажы Айға жақындап қалғаны хабарланды. "Орион" ғарыш кемесі 1 сәуірде ұшырылды. 4 сәуірге қарай Artemis II экипажы Жер мен Ай арасындағы жолдың жартысын еңсерді.

Миссия барысында астронавтар Айды айналып өтеді, бірақ оның бетіне қонбайды. Жерге оралу 10 күннен кейін жоспарланған.