АҚШ президенті Дональд Трамптың күмәніне қарамастан, Вашингтон Украинаға Patriot зымырандарын өндіруге лицензия беру мәселесі бойынша келіссөздерді жалғастырып жатыр. Бұл туралы Reuters агенттігі дереккөздерге сілтеме жасап хабарлады, деп хабарлайды dalanews.kz.
Агенттік мәліметінше, қарастырылып жатқан нұсқалардың бірі бойынша Украина Patriot зымырандарының жекелеген бөлшектерін өндіріп, ал олардың соңғы құрастырылуы Еуропада жүзеге асырылуы мүмкін.
Дереккөздердің айтуынша, Трамптың АҚШ әзірге Киевке Patriot зымырандарын өндіруге рұқсат беруге келіспегені туралы мәлімдемесі Ақ үйде Владимир Зеленскиймен өткен «күрделі» кездесуден кейін жасалған. Соған қарамастан, келіссөздер тоқтатылған жоқ.
«Келіссөздерді тоқтату туралы ешқандай бұйрық болған жоқ», – деген дереккөздің бірі.
Оның айтуынша, талқылаулар америкалық қорғаныс компанияларының, әскери өкілдердің және өзге де тараптардың қатысуымен жалғасып жатыр. Reuters мәліметінше, қазіргі уақытта бірнеше ықтимал сценарий қарастырылуда. Олардың қатарында:
- Украинада Patriot зымырандарының жекелеген бөлшектерін өндіріп, кейін оларды Германияда түпкілікті құрастыру;
- Украинаны АҚШ пен Еуропаның Patriot зымырандарын бірлесіп өндіру бағдарламасына қосу;
- Киевке PAC-3 зымыранының арзанырақ нұсқасын өндіруге мүмкіндік беру.
Трамп әкімшілігінің өкілі АҚШ Украинамен қорғаныс өнеркәсібі саласындағы болашақ ынтымақтастықтың бірнеше бағытын қарастырып жатқанын айтты. Сонымен бірге ол кез келген келісім америкалық технологиялардың қорғалуын қамтамасыз етуі тиіс екенін атап өтті.
Reuters дереккөздерінің бағалауынша, ең шынайы нұсқа – Украинада компоненттер өндіріп, оларды Германияда түпкілікті құрастыру.
Алайда тараптар келісімге келген күннің өзінде Украина жаңа Patriot зымырандарын жақын арада ала алмайды. Агенттік мәліметінше, өндіріс кемінде бір жылдан кейін ғана басталуы мүмкін. Себебі лицензиялық келісім жасалғаннан кейін жаңа өндірістік желілерді іске қосу әдетте үш жылдан жеті жылға дейін уақыт алады.
