AQSh prezidenti Donald Tramptyń kúmánine qaramastan, Vashington Ýkrainaǵa Patriot zymyrandaryn óndirýge litsenziia berý máselesi boiynsha kelissózderdi jalǵastyryp jatyr. Bul týraly Reuters agenttigi derekkózderge silteme jasap habarlady, dep habarlaidy dalanews.kz.
Agenttik málimetinshe, qarastyrylyp jatqan nusqalardyń biri boiynsha Ýkraina Patriot zymyrandarynyń jekelegen bólshekterin óndirip, al olardyń sońǵy qurastyrylýy Eýropada júzege asyrylýy múmkin.
Derekkózderdiń aitýynsha, Tramptyń AQSh ázirge Kievke Patriot zymyrandaryn óndirýge ruqsat berýge kelispegeni týraly málimdemesi Aq úide Vladimir Zelenskiimen ótken «kúrdeli» kezdesýden keiin jasalǵan. Soǵan qaramastan, kelissózder toqtatylǵan joq.
«Kelissózderdi toqtatý týraly eshqandai buiryq bolǵan joq», – degen derekkózdiń biri.
Onyń aitýynsha, talqylaýlar amerikalyq qorǵanys kompaniialarynyń, áskeri ókilderdiń jáne ózge de taraptardyń qatysýymen jalǵasyp jatyr. Reuters málimetinshe, qazirgi ýaqytta birneshe yqtimal stsenarii qarastyrylýda. Olardyń qatarynda:
- Ýkrainada Patriot zymyrandarynyń jekelegen bólshekterin óndirip, keiin olardy Germaniiada túpkilikti qurastyrý;
- Ýkrainany AQSh pen Eýropanyń Patriot zymyrandaryn birlesip óndirý baǵdarlamasyna qosý;
- Kievke PAC-3 zymyranynyń arzanyraq nusqasyn óndirýge múmkindik berý.
Tramp ákimshiliginiń ókili AQSh Ýkrainamen qorǵanys ónerkásibi salasyndaǵy bolashaq yntymaqtastyqtyń birneshe baǵytyn qarastyryp jatqanyn aitty. Sonymen birge ol kez kelgen kelisim amerikalyq tehnologiialardyń qorǵalýyn qamtamasyz etýi tiis ekenin atap ótti.
Reuters derekkózderiniń baǵalaýynsha, eń shynaiy nusqa – Ýkrainada komponentter óndirip, olardy Germaniiada túpkilikti qurastyrý.
Alaida taraptar kelisimge kelgen kúnniń ózinde Ýkraina jańa Patriot zymyrandaryn jaqyn arada ala almaidy. Agenttik málimetinshe, óndiris keminde bir jyldan keiin ǵana bastalýy múmkin. Sebebi litsenziialyq kelisim jasalǵannan keiin jańa óndiristik jelilerdi iske qosý ádette úsh jyldan jeti jylǵa deiin ýaqyt alady.
