Ақмола облысы Бұланды ауданында су құбыры инфрақұрылымы нысанынан құны шамамен 7 миллион теңге болатын дизель-генератор қондырғысы мен оның жиынтықтарын ұрлаған күдіктілер анықталды, деп хабарлайды dalanews.kz.
Тергеу барысында 2025 жылы Алтынды ауылдық округіндегі елді мекендердің бірінің шетінде дизель-генератор қондырғысы орнатылғаны анықталған. Жабдық ауыз сумен қамтамасыз ету жүйесінің үздіксіз жұмысын қамтамасыз ететін су құбыры инфрақұрылымының бір бөлігі болған. Жедел іздестіру іс-шаралары барысында Бұланды аудандық полиция бөлімінің қызметкерлері осы нысанда жұмыс істеген екі адам қондырғының орналасқан жері мен нысанды күзету тәртібі туралы ақпараттан хабардар болғанын анықтады.
Тергеу мәліметіне сәйкес сәуірде күдіктілер алдын ала сөз байласып, қымбат жабдықты ұрлауды жоспарлаған. Олар көлікті, жүкшығырды және өзге де құралдарды пайдаланып, нысан аумағына кірген. Содан кейін құны шамамен 7 миллион теңге болатын дизель-генераторды бөлшектеп, алып кеткен. Ұрлық салдарынан елдімекеннің ауыз сумен қамтамасыз етілуіне қажет су құбыры инфрақұрылымының жұмысы бұзылған. Алайда күдіктілер мұнымен тоқтамаған.
Мамырда топ ұйымдастырушысы сыбайласына осы серіктестік аумағынан тағы да мүлік ұрлауды ұсынған. 6 мамырда олар құны 400 мың теңгеден асатын дизель қондырғысының құрамдас бөліктерін ұрлап кеткен.
"Полиция қызметкерлері жүргізген жедел іздестіру және тергеу іс-шаралары нәтижесінде күдіктілер анықталды. Ұрланған жабдықтар табылып, тәркіленді. Қазір тергеу амалдары жалғасып жатыр", - деді ІІМ өкілдері.
