Aqmola oblysy Bulandy aýdanynda sý qubyry infraqurylymy nysanynan quny shamamen 7 million teńge bolatyn dizel-generator qondyrǵysy men onyń jiyntyqtaryn urlaǵan kúdiktiler anyqtaldy, dep habarlaidy dalanews.kz.
Tergeý barysynda 2025 jyly Altyndy aýyldyq okrýgindegi eldi mekenderdiń biriniń shetinde dizel-generator qondyrǵysy ornatylǵany anyqtalǵan. Jabdyq aýyz sýmen qamtamasyz etý júiesiniń úzdiksiz jumysyn qamtamasyz etetin sý qubyry infraqurylymynyń bir bóligi bolǵan. Jedel izdestirý is-sharalary barysynda Bulandy aýdandyq politsiia bóliminiń qyzmetkerleri osy nysanda jumys istegen eki adam qondyrǵynyń ornalasqan jeri men nysandy kúzetý tártibi týraly aqparattan habardar bolǵanyn anyqtady.
Tergeý málimetine sáikes sáýirde kúdiktiler aldyn ala sóz bailasyp, qymbat jabdyqty urlaýdy josparlaǵan. Olar kólikti, júkshyǵyrdy jáne ózge de quraldardy paidalanyp, nysan aýmaǵyna kirgen. Sodan keiin quny shamamen 7 million teńge bolatyn dizel-generatordy bólshektep, alyp ketken. Urlyq saldarynan eldimekenniń aýyz sýmen qamtamasyz etilýine qajet sý qubyry infraqurylymynyń jumysy buzylǵan. Alaida kúdiktiler munymen toqtamaǵan.
Mamyrda top uiymdastyrýshysy sybailasyna osy seriktestik aýmaǵynan taǵy da múlik urlaýdy usynǵan. 6 mamyrda olar quny 400 myń teńgeden asatyn dizel qondyrǵysynyń quramdas bólikterin urlap ketken.
"Politsiia qyzmetkerleri júrgizgen jedel izdestirý jáne tergeý is-sharalary nátijesinde kúdiktiler anyqtaldy. Urlanǵan jabdyqtar tabylyp, tárkilendi. Qazir tergeý amaldary jalǵasyp jatyr", - dedi IIM ókilderi.
