“Қазгидромет” РМК алдағы үш күнге арналған ауа райы болжамын жариялады. Синоптиктердің мәліметінше, еліміздің солтүстігінде жаңбыр жауып, найзағай ойнаса, оңтүстік пен шығыста аптап ыстық сақталады, деп хабарлайды dalanews.kz.
Болжамға сәйкес, солтүстік-батыс циклоны мен атмосфералық фронттардың әсерінен Қазақстанның солтүстік өңірлерінде жаңбыр жауып, найзағай күтіледі. 15-16 шілде күндері кей жерлерде нөсер жаңбыр жауып, бұршақ түсуі мүмкін. Сондай-ақ желдің күшеюі мен дауылды құбылыстар болжанып отыр.
Синоптиктердің айтуынша, циклонның ықпалымен елдің солтүстік бөлігінде ауа температурасы төмендеп, күндіз +25…+30°C шамасында болады.
Ал Қазақстанның оңтүстік және шығыс өңірлеріне Өзбекстан аумағынан құрғақ әрі ыстық ауа массалары келуін жалғастырады. Соның салдарынан бұл аймақтарда жауын-шашынсыз, аптап ыстық ауа райы сақталады. Күндізгі температура оңтүстікте +40…+45°C-қа, ал шығыста +33…+38°C-қа дейін көтеріледі.
