Алматыда бұрынғы сүйіктісін аңдып, мазалаған әйелге қатысты іс тергеліп жатыр, деп хабарлайды Ulysmedia.kz., деп хабарлайды dalanews.kz.
Қалалық полиция департаменті қоғамдық қауіпсіздік басқармасы бастығының орынбасары Айтан Елеусізовтің айтуынша, биыл мегаполисте сталкингке қатысты 24 арыз тіркелген. Соның бірі — әйел адамның бұрынғы серіктесімен қарым-қатынасты қайта жалғастыру әрекетіне байланысты болған.
Оның сөзінше, әйел бұрынғы жігітімен қайта қосылғысы келген. Алайда ер адам ол кезде отбасылы болғандықтан, некесін сақтап қалу үшін полицияға жүгінген.
"Әйелдің сталкингке баруына қарым-қатынасты қайта жандандыру ниеті себеп болған. Бірақ екінші тарап – қазір үйленген адам. Сондықтан ол қолданыстағы некесін сақтау үшін полицияға арызданды", – деді Елеусізов өңірлік коммуникациялар қызметіндегі брифингте.
Қазіргі уақытта іс өндірісте жатыр. Сондықтан алматылық әйелге қатысты нақты қандай шара қолданылатыны әзірге белгісіз.
Айта кетейік, Қазақстан Қылмыстық кодексінің 115-1-бабына сәйкес, сталкинг үшін 200 АЕК-ке дейін айыппұл, сол мөлшерде түзеу жұмыстары, 200 сағатқа дейін қоғамдық жұмыс немесе 50 тәулікке дейін қамау жазасы қарастырылған.
